Enlace a Legislación Relacionada

Ver enlace a ultima versión de Texto Publicado
Nikarawah walanibis balna kau diyulwa ki, King Lani Biyamg balna Kidi, pa muihni balna kau yulwi dakana, yulbauwi tatalna dawak ma takitkau La ukna kidi barangni yayamna ki:
Tuna Niningkawa Yulni

MAYANG,

Nikarawah Pani Muihni Tanituna, King Lani Rikni yamyang balna kapat kaluduhna mayang,

Sara mani kaupak ma inkidian sulani balna kalbauwi aina kidi. Sau wisamni yalahwa pani sulani bitik kaluduh yalahnin kulnin lani duda kidi, dawak ma paki balna nining kulnin parasni duwi tanitdakwi aina balna kidi, dawak tannika laih talnin sip mayang, General JOSE DOLORES ESTRADA, ANDRES CASTRO dawi ENMANUEL MONGALO, balna yayamna yak, witinna kuduh, kuma paskaupak dimalyang ma sauki yak aina balna dawak miriki suku turukyang balna niningkauh bik kalbauwi minit bayayakna dai kidi.

BENJAMIN ZELEDON Sau uk muihni balna ai kawi ma sauki daknin yayamna nining kauh kalbauna kidi.

Pri Ahalni Balna Generalni, AUGUSTO C. SANDINO, Pa Muihni dawi MuihTaihyang Niningkauh batanghna Tingnita yamyang Papangni.

Kulnin dadasni duwi kalbauna RIGOBERTO LOPEZ PEREZ, witin kuduh Muihtaihyang gabamintni witnin tani tunan bahna kidi.

CARLOS FONSECA tingta yamna wayani talda kidi, Sandino tingta yamna usnit uiyang baisa nuhni kidi, Frente Sandinista de Liberación Nacional tuna bahna muihni, tanituna.

King sauni aiska pri yaknin yulni tani tunan duwi kalbauwi dadauna balna dawak minit bayayakna balna bitik kau.

Nicaragua walanibis balna; Sahwi kalahwi, kaluduhna satni balna bitik kau; saunina kau dalani talwi ribulusan usnit uywa bitika kau; Nicaragua ahalni dawi yayalni balna bitik kau: wark muihni dawi di dahyang balna bitik kau; minit bayakyang wahnima dawi sirauni balna; minit bayakyang itangni balna; papang kau barangni kulwi muih miniknakunni yulni kalbauwi aina balna kidi; sins duna balna saunini kulwa muihni balna; dawak angdika bitik warkni yamwi minik yakwi sauni aiska tanitdaknin warkni kau paraswa balna bitik kau.

Sulani wisamni aiwa balna barangni alasna atnin yulni muihtaihyang balna niningkauh kalbauwi aiwi dawak sangninaka bik diawa muihni balna yulnina bik.
Ribulusan wark yamwi minik yakna balna, dawak pa muihni yalahwa satni wisamni as, taihna lani dis yalahwa tannika as binin yulni kat, warkni yamwi anipis balna bibina karang, dawak Nicaragua muihni balna sangnika, barakgnin tani yak, papatni yalahwa atnin, dawak muih ramhnina kidi kasak palni risnipik kalana karang.

MASAUNI AISKA, TINGTAWISAMNI BTANHNAMASAUKI SULANI BIITK KALUDUHWI YALAHNIN YULNI DAWAK PRI LANI YULNI KAT

NIKARAWAH KINGNI KAWA SAUNI AISKA LANI RIKNI YULNI TUNAN AYANGNI KULNIN TUHNI RIKNI BALNA LA TUNA SAHYAKNA ASLAH

Lanibin 1. Nikarawah Sauni dakwi Kingni awi duwi, Sauni tanitdakwi, Alas lani awi duwi Yalahwa kidi, pa muihni ramhnina kapat sip dadawas karang ki, dawak Nikarawah sulani kingni awi yalahwa kulnin lani tuhni rikni as ki. King sauni uk kaupak Nikarawah sangnika pasyak kulnin lani anin trai talwa awaskat, ramhnina parasni parahkau laknin trai talwa bitik kidika pa muihni sangnika niningkauh yamwa karang ki. Nikarawah walanibis bitik salahni yak duwa ki, adika ramhni balna tanit dakwi minit talna atnin.


Lanibin 2. Nikarawah sauni daklawi Kingni awi yalahwa parasni kidi pa muihni sangnika pas yak sakki, dawak warkni yamwa ki, pa muihni bitik parasni anin tani balna munah, pri lani munah tingta pasyak kawi dawi kulnin barangni awa ki, yaka munah sangnika baraknin, pulitik dawak pa muihni tani yayamni balna bibiwa ki. Gabamint tingta parasni kidi, pa muihni balna tunan duwa ki, witinna balna kuduh, tanituna balan pri lani munah, papatni, barangni dawak minitpakwi walwi yayakwa ki, muih uk awaskat kaluduhna as yaklauwi taihwi di pakwak walwi yayakwas ki tanituna balna. Dawak bik sip karang, pa muihni bitik kaluduhwi tanituna walwi yakna atnin, ampat tani balna adika lani rikni dawak lani uk kau barangni yayamna yaka munah yamnin sip karang.

Lanibin 3. Pri lani dawak King sauni uk balna pas yakat bik la barangni papatni as duwi yalahnin usnit uywi patni kalahnin yulni, Nicaragua walanibis kapat pranimis duwa kidi sip rumhwi dawas karang. Yaka yulni kat, muih uk kau taihnin, taihwi di yamwi King sauni uk balna manah baraknin wawalwa kidika lani bitik niningkauh mayang, dawak pa muihni balna taihna lani dawi ahni kau danin lani ninigkauh kalbabauwa balna bitik kau di
parasda ki.

Lanibin 4. Muih bitik yamnini yulni kat, gabamint yaklauwi paraswi barangni yamwa karang, pa muihni sangnika dawi warkni baraknin yulni, yaka yulni Nikarawah ahalni, yayalni bitik sangninaka baraknin yulni di parasna karang, kaput bahang tanit dakna karang taihna lani, ahni kau danin dawak, kangwi yaknin lani balna bitik niningkauh.

Lanibin 5. Nikarawah walanibis balna kulninna tuhni kau duwa ki, pri lani kidi, la barangni kidi, muih muihni nuhnini risnipik kalanin kidi, pulitik, pa muihni dawi sulani satni mahni kidi, sau dawi yamnini daniwan satni duwa kidi, King sauni uk karak, pri lani kat biri biri kalparasnin lani kidi, dawak sulani balna bitik pri lani kat kingni lani awi duwi yalahnin kidika.

King tingta laihnin wawalwa daknini satni mahni kalpakwi wark yamwa munah, barangni yamwa ki, pulitik kaluduhna satni mahni kidi kalpakwi wark yayamwa atnin, pa lalahnin, gabamint tingta dawi pa muhni balna bitik sangnika baraknin yulni kat, kulnin lani satni bitik kau ramhnina duduwa ki, kaunah niningkauh karang ki, angdika dakni balna, pa muihni kau taihwi diyamnin awaskat, pa muihni kulnin lani niningkauh yayamwa balna kidika.

King tingta parasni adika indian sulani bang kidika risnipik kalawa ki, dawak adika King Lani Rikni kau ramhnina, dawi yamnin duwa balna kidi bitik yus munnin ramhnina duwa ki, baisa palni laih, sara mani kaupak sulani lanina duduwa kidika ban duwi yus munwi barakna atnin, pani muihni balna alas kaluduhnin lani duduwa
kidika, dawak witinna pas kau di duduwa kidi alas tuna duwi wauhna atnin, kaput bik, pa binina kal uduh yalahwi saunina dakwi lawi yus mumunwa kidika ban duduwa atnin, dawak yamnini balna ban duwi yus munwa atnin, bitik kidika la yulwa pas munah karang. Atlantik Kus pani muihni pani binina yulni kat, Alas Yalahwa lani as yamwi dawa ki, adika Nikarawah Kingni Lani Rikni pas akat.

Di daniwan kalahnin satni bitik kidika: Gabamint dini, Alas dini, Dakni as dini, didahyang daknini as dini dawak indian pani muihni dini kidi, barangni tanit dakna karang, ahni kau danin lani dis, pa ritsni dulaunin yulni kat, dawak bitik kidika, kulninna pri lani kat, pa muihni sangninnaka barakin tingta yamna karang.

Nikarawah kidi King sauni uk karak kalpakwi tingta yamwa ki, King sauni as King sauni uk karak biri biri kalpakwi kalparaswa lani munah. Yaka bahang, King sauni uk kau kawi, gabamnit tingta yamnin, arakbus karak kanin, lalahni tani kau, sulani sangnika kau, awaskat, suts warkni yayamwa kulnin munah duwi, King sauni uk sangnika pas kanin lani kidi rumhwi dawa ki dawak yamwas karang. King sauni as dawi King sauni uk karak isninglak lani sat uk sat uk duduwarang kat, King sauni mahni kalpakwi la yayamna pasmunah kawi barangni yayamna karang, dawak King as sauna paskau, awaskat, King biri biri kakahni duwa yulni, bumba dudutni rumhnin lani balna, dawi di mahni daukalnin dini rumhnin lani balna bitik niningkauh ki; King as yaklauwi sauni walanibis as kau kakahni kalyamnin usnit uywa kat, tanit dakna karang, kaput bik, King as yaklauwi, King uk kalni dinit kau buknin lani kidi nining kau ki.

Nikarawah kidi kal irikwa ki Sau Wisamni Yalahwa Pani Bitik Kalpakna Ramhnina kulnin lani tuhni rikni ukna balna pasyakat, kidika kuduh, Kingnina lani parsni duwa munah, talwi yakwi ayangnina rawasna ki. Nikarawah, Sau wisamni yalahwa pani papus kingni sauni balna karak kalpakwi yalahnin kidi yaksihni talwa ki, dawak trai talwa ki, mani as Sau wisamni yalahwa pani papus kingni sauni balna kidi sau aslah kapat yalalahna atnin lani
watwi dulauna atnin.

Lanibin 6. Nikarawah kuduh gabamint as parasni alas duwi, pri ki, sauni daklawi tanit dakwi duwi, sauni parasni uduhna aslah ki, dawi sip sahwi kalahwas ki.

Lanibin 7. Nikarawah kuduh pa muihni balna karak kalpakwi gabamintni tunan duwa ki, pa muihni balna tingta, pasyak kawi tunana duduwa ki.Gabamint tingni rikni balna ki: La Binin Parasni, Gabamnit Tingta Wauhnin Parasni, Gabamnit Lani Laihwi Yamnin Parasni, dawi Iliksan Tunan Wauhnin Parasni.

Lanibin 8. Nikarawah pani muihni balna kuduh sulani satni mahni ki, dawak Abya Yala papus sauni pasyak sak ki.

Lanibin 9. Nikarawah laih barangni tanit dakwa ki, Sau wisamni yalahwa pani papus kingni sauni balna kidi kalpakwi aslah yalahna atnin, yaka yulni Sau wisamni yalahwa pani papus sauni balna paskau tingta balna dawak lalahni baraknin tingta yamnin dawi biri biri kalparsnin kulnin lani kidi paraswi tanitkau dulauwi kiwa ki, kaput bik, sauni pisni akat, pri lani duwi yalahnin lani kidi barangni diparaswa ki.

Nikarawah dukih kalawi Sau wisamni yalahwa pani aiska dawi kuma paskau kalansah sauni walanibis balna bitik kidika kalpakwi aslah yalahna atnin, Bolívar dawi Sandino kulnin lani duduwa dai munah.

Yaka bahang, Sau wisamni yalahwa pani papus dawak Sau wisamni yalahwa pani aiska sauni kingni balna karak kalpakwi adika warkni yamnin yulni kat, kaluduhna satni balna walwi bibina karang, dawak bik walwi yayakna karang.

Kulnin lani tuhni rikni adika tingnita yamni kat, King sauni uk uk balna karak kalpakwi yulbauwi la yayamwarang munah yayamna karang ki.

Lanibin 10. King sauni daklana aiska adika kuduh libitna sakki, karibi kumani dawi pasipik kumani, kaput bik Honduras dawi Costa Rica Sauni daklana papus yakat. Nikarawah sauni kingni, parasni dawak ramhni kidi bayakwa ki, kumani kung kalansah nunuhni dawi bikikisni balna, kaput bik, kaumah yaihnitkau bang balna kidika bik, kaput bik paskau was bang balna kidika bik, kuma pisni bik, yaihnit kau sauni bik, kuma dinit sauni bik, lalahni barakin tingnita yamnin pisni bik, dawak ma kau wing kira pisni daklana bik, bitik kidika, King sauni mahni kaluduhwi la yayamna yakat lani awi duwa ki.

Nikarawah kingni sauni adika king sauni uk kau karak risnipik lani kalana karang, angdika balna pri lani munah kulnin lani barangni ana balna kidika manah, dawak bik Nikarawah kingni lani rikni munah, dawi dawi king mahni kaluduhwi la yayamna balna balna kidika manah. Kaput bahan, angdika lani balna, king sauni uk balna
rawaswasna karang bik, Nikarawah pas kau kawi rawaswas balna kalaih risnipik kalawas karang.

Lanibin 11. Ispayul tuni kidika king sauni pas akat tuni palni kapat yus munna karang. Nikarawah Atlantik Kus sauni kau sulani tuni uk yuyulwa balna kidika bik, la kau ais yulwarang yakat, tuni palni kapat yus munna karang.

Lanibin 12. Manawah pani adika king sauni Kapitalni ki, dawak King Tingni Rikni Parasni balna anipis rikni duwarang ki. Tannika uk as kalahwarang laihtak, pa uk kau dunin sip karang, adika king sauni daklana pas akat.

Lanibin 13. King sauni daklana wayani balna kuduh: King Sauni Lanwana, Sauasna dawak Sauasna wayani, dawak la ukna munah yamna ki, dawak bik ampat yus munnin bik lani ana ki.

Lanibin 14. King sauni parasni adika alas sutsni kapat as diski.

Lanibin 15. Nikarawah walanibis balna kidi sipki sulani atnin, awaskat sulani kalna atnin.

Lanibin 16. Sulani balna ki:

1) Kingni sauni pas akat batanhna balna kidi. Kidi pasyak kakawas ki, king sauni uk balna, kingni warkni yamwa bang walanibis balna, Kin sauni uk muihni balna aninapis tingnita yulni aiwi kakana balna kidika, kaput bik, kingnina yaklauwi Nikarawah sauni kau warkni yamnin sisihna balna kidika, ban bik, Nicaragua walanibis kalnin yulni yuyulwarang laihta kat, sip karang ki.

2) Walabis papangni kidi awaskat itangni kidika Nikarawah walanibis kat.

3) Sau uk kau batanhna muihni bin kidi papangni awaskat itangni kidika tanitkau Nikarawah walanibis dai kat, kauna kidika bik, kurihni muihbarak laihwarang mani Nikarawah walanibis kalnin yulwarang kat.

4) Nikarawah sauni pas akat, muihbinina dini almuk dis kat walwi yayakna balna kidika, trabil as bik dis karang ki, dini almuk kalahwarang mani lani uk yamnin mani kaiwarang balna bik.

5) Batanhna muihni bin dini almuk balna king sauni uk muihni balna karang bik, Nikarawah plinni awaskat kuringnuhni paskau batatanhna kat, yaka bik kaput dukih yuyulwarang kat.

Lanibin 17. Sau wisamni yalahwa pani papus kingni sauni walanibis palni balna kidi ramhnina duduwa ki, Nikarawah walanibis kalnin yulna atnin, dawak witinna saunina kaupak dakwi kalahwas ban yulna atnin sip ki, dawak sip karang yulna atnin gabamint parasni duwa anipis as kau, muihni kidi Nikarawah sauni pas akat yalahwa kat.

Lanibin 18. Gabamint lani yamwa anipis rikni kidi sip karang ki, Nikarawah walanibis kapat yulwi yakna atnin, king uk sauna walanibis as, Nikarawah yulwi wark nuhni minitbayak yamna muihni as kau.

Lanibin 19. King sauni uk walanibis kalna kidi sip karang Nikarawah walanibis kalna atnin, tanit kau kingni sauni kaupak dakwi kalahna atnin ki, dawak bik, parasni duwa anipis as kau yulna karang ki, angdika mani, adika lani kau ais yulwa bitik kdikika barangni yamwi duwa karang kat.

Lanibin 20. Nikarawah walanibis as kau bik, Nikarawah walanibis kapat wauhnitaya duwa kidi sip dakyakwas karang. King sauni uk walanibis kalna yulni, Nikarawah walanibis wauhnitaya duwa kidi diswas karang.

Lanibin 21. Nikarawah sauni walanibis kalnin, disnin dawi watwi dunin tani balna kalaih la balna munah barangni yamna karang.

Lanibin 22. King sauni bu walanibis atnin kalaih, kingni sauni bu biri biri ampat kalpakwi lani yayamna munah lani barangni yamna karang.


Lanibin 23. Muih sangnika ramhni kidi, sip minit bayakwas ki, dawak muih kapat dini palni ki. Nikarawah akat la munah muih inin lani dis ki.

Lanibin 24. Muih alas kidi di yamnin duwa ki, wanaihni yulni, pani yulni, king sauni yulni, dawi muih bitik yulni bik. Muih bani ramhni kidi kidi witwa ki, muih uk ramhni duwa balna yakarak, muih bitik sangnika tanit daknin daknin yulni dawi muih bitik yamnini yuyulwa yulni kat.

Lanibin 25. Muih alas kidi ramhni duwa ki:
1) Muihni kat pri ni lani.
2) Sangnika tanit daknin.
3) Muihni nuhni dawi la munah parasni duwa kidi rsinipik kalana
atnin.

Lanibin 26. Muih slas kidi ramhni duwa ki:
1) Alas sangnika lani dunin dawi unipas sangnika dunin bik.
2) Unipas kau muih kawi lani bahnin awas, muih uk wauhtaya awas kat di sisihwa kat muih uk yaklauwi laihwi talnin lani dis ki.
3) Muihni kalkulna lani dawi ayangni yamnini risnipik kalana atnin.
4) Gabamint muihni balna witin yulni ais duduwa balna kidi amanglanin lanin ramhni duwa ki, dawak ais yulni dawi ais yamnin yulni kidika yulni duduwa pa amanglanin ramhni duwa ki.

Muih as uni pas kau kiwi kanin sip karang ki, La wihta parasni duwa yaklauwi anidar kalawa munah,

Kaunah sip karang kana atnin:

a) upas kau kawa muihni balna yaklauwi yaka unipas yak la nining kauh dini balna yamwa bang ki atwarang kat, awaskat pas yakaupak ilp yuyulwarang kat;

b) kuh buswa karang kat, awas kat kakahni dutni as yulni upas muihni balna sangninaka disninna sip kat, awaskat uni disnin sip karang kat;

c) upas yak talwas muihni uiwi kakana kat, dawak muihni balna kidi di dutni yamnin trai talwa bang karang kat;

d) la bahna muihni as laihnin atwi uywi kiwa awarni balna yak kiri kiwi yakat kaki yakmalda sak karang kat;

e) muih malwi duwi kiuna muihni as laih yaknin yulni kat. Adika dini bitik pas akat la munah yamna karang ki.
La yaklauwi laih yulwa ki, wauhtaya satni balna, numba kulwi yakna, dawi wauhtaya sat uk uk bik, laihwi talnin yulni kat, kidika bitik, la wihta balna awaskat, di minit daknin wihnita balna laihwi talnin nitni sak karang kat.

Wauhtaya ulwi sihna, dawak muih wauhnitaya sat uk uk balna, la pirini kaupak laihwi yayakna balna bitik kidi la yamwa paskau, awaskkat ahni yak bik parasni dis karang ki.

Lanibin 27. Muih bitik kidi la muhni yak papatni ki, dawak papatni tanit daknin ramhni duwa ki. Di awas kapat klakulnin lanin lani dis karang ki, batanhna pani yulni, King sauni as paskaupak yulni, king tingnita paskau kanin walwa yulni, sulani, al awaskat yal yuulni, tuni yulwa yulni suts duwa yulni, kulnin lani, sara sulani duwa yulni, lalah dis awaskat minikunni yulni.

King sauni uk kaupak muihni balna kidi Nikarawah walanibis balna karak di yamnin duduwa kidi dawak ramhnina papatni duduwa ki, Kaunah king tingnita kau kanin ramhni dawi la yulwas balna kalaih ramhnina dis ki; king sauni pas kau tingnita yulni pasyak kanin anidar dis ki.

Gabamint sauni parasni kidi rispik mundi tanitdakwa ki, adika lani rikni kau ais yulwa bitik kidi, sauni pas akat ai kana muihni bitik kau ramhni kalawa ki, dawak witin parasni dinityak tanitdakna karang.

Lanibin 28. Nikarawaha walanibis balna, king sauni uk bang kidika bik gabamint sauni parasni yaklauwi tanit dakwi mint talwa ki, kidika bitik laih yamwa karang ki, gabamint tingta yamnin tada king sauni uk sihna muihni balna munah.

Lanibin 29. Muih bitik kidi ramhni duwa ki pri lani kat yul kulnin, sinsni lani dunin, dawi suts lani as laihnin awaskat laihwas atnin. Muih as kau bik taihna lani karak diyamwi adika ramhni dakyakwas karang, dawak taihna lani karak diyamwak sutsni yulni, kulnin lani, ais kau kulwa balna kidi yul yakwas karang.

Lanibin 30. Nikarawah walanibis balna kidi ramhni duwa ki, yul kulwa balna kidi pri yulwi yaknin, muih mahni awaskat, bulah, aslah aslah karak awaskat dakni bin as kau yulwi yakna atnin, yulbauwa munah, ulva munah awaskat tani uk munah bik.

Lanibin 31. Nikarawah walanibis balna ramhnina duduwa ki, king sauni aiska pas akat awaihna atnin, dawak kin sauni pas akat, angdika pani yak karang bik sip ki pani duwi yalahnin; king sauna pas akat pri lani kat kai kanin dawak kalahnin ramhni duwa ki.

Lanibin 32. Muih as kau bik taihna lani karak diyamwak yamwas karang ki, La kau yulwas dini balna kidi, dawak bik taihna lani karak kalawak laihwatwas karang, La yaklauwi putwas dini balna kidi.

Lanibin 33. Muih as bik, ban kaupak muih aslah kulnin lani yulni, silak uni awaskat prisin uni kau awas karang ki, dawak prini lani bik dakyakwas karang ki, La munah ais yulwa yakat dawak ampat yamnin tani ukna balna munah sip karang ki, yamna atnin. Kaput bahang:

1) Silak kau laih watnin sip karang ki, La wihta parasni duwa muihni as adar ulwi sihwa karak manah, awaskat La yaklauwi parasni kalana muihni balna ulwi sihwarang kat, Kaunah sip karang yamna atnin awarni yak ramh palni laih la bahwa karang kat.

2) Silak kau laihwatna muihni bani kidi ramhni duwa ki:
2.1 Laih watwi duwas isningpaknin karang ki, witin amanglawa tuni kau, dawak yayahni kaupak kalyulna karang, ais yulni silak kau laihwatwa tannika, dawak witin niningkauh ais yulni dutni yayakwa kidika; tingparah balna dawak witin palni yaklauwi bik kalawak wanaihni balna kau isning paknin ki; dawak bik muih mayang lani kat, risnipik karak di yamna karang ki.

2.2 Silak kau laihwatna kaupak awar 48 bayakwa pasyakat pri yaknin karang ki, awaskat, La yamnin parasni duwa tingni kau lanin karang ki.

3) La bahna minit lauwi bayakna kaupak, la parasni duwa muihni yaklauwi silak kaupak yaknin anidar lana kaupak, muih as bik baisa silak uni kau sak atnin anidar dis ki.

4) La minit bayakwi muih kau silak awa bani kidi, La parasni duwa muihni niningyak kakahni kaiwa karang, warkni yulni dawak la bahna yulni bik.

5) Muih silak uni kau duwa tanituna balna kidi, trai tatalna karang, silak muihni baisa lani yamwa balna, dawak lani yamwi paat kau rumhna balna kidi wayah yakwi pani uk uk kau duduwa atnin.

Lanibin 34. Lani yamwa muihni bani kidi ramhni duwa ki, papatni lani kat, adika sangnika tanit dakna balna bikikisni balna adika:

1) Kakahni dis muihni kapat kalkulna karang, La yamwa munah patni duwa kidi baisa nining kawas karang mani.

2) Laihwatwas palni Lani yamna karang ki, la yaklauwi, La wihta parasni kalana muihni balna yaklauwi. Silak muihni kidi la wihta uk tingni kau murwi lanin lani diski. Muih as bik La wihta lani yamwa tingni kaupak yakwi, la wihta uk tingni kau duwi lanin yamnin lani dis ki.

3) La yaklauwi kapat yamnin pakna balna kidi, La amanglayang dakni as tingni kau lanin karang ki, lani kidi yamnin yulni. Lani yamna kidi watwi laihwi talnin lani kidi awi dawa ki.

4) Lani yamwa tuna kaupak sansni kalana karang, witin dawi tanitdakwa muihni kidi yulbaunin, kaput bik sansni kalana karang, ma ampus dawak ampat tanitdaknin tani duwa atnin yulni.

5) La yamwa tuna bahwa kaupak tanitdakyang muihni dis karang kat, gabamint yaklauwi layar as pakna karang, tanitdaknin yulni; awaskat la awa wauhnitaya ulwi sihna mani kaupak tanitdaknin muihni pakwas karang kat.

La kau duwa muihni kidi ramhni duwa ki, tanitdakwa laniyar karak pri lani kat albulah yulbauwa atnin.

6) La muhni kau sak awa mani ramhni duwa ki, tuni wirlayang muihni as duna atnin, dawak, La wihta ais tuni kau yuyulwa kat wirlawi tanitdakwa atnin.

7) Taihna lani karak kalyamwak alas niningkauh yulwas karang ki, maritni awaskat yalni awaskat alni niningkau yulwas karang ki, kaput bik wanaihni balna ani palni muihni balna dawak maritni wanaihni balna niningkauh bik, kaput bik taihna lani karak yamwak trabil duyang kapat yulwi yakwas karang ki.

8) La yaklauwi ma ampus pas yak lan yamwi saran laihni yulna yakat, lani yamwi saran laihnin karang ki, la yamnin anipis parasni bani yak.

9) La bahna yulni, lani yamwi pat kau rumhna mani, ramhni duwa ki, wihta baisa parasni duwa muhni kau kiwi lani walna atnin, lani yamna kidi watwi laihwi talnin yulni.

10) La as bahna yulni la yamwi bayakwi silak kau awah kawi lauwi bayakna awaskat, kawi bayakwi pri ni lani duna kat, sim patni yulni watwi la kau duwi kiwas karang ki.

11) La tingni kau duwi uywas karang, dawak la awi pat kau bik rumwas karang, trabil as yamna awaskat di as yamwas dana yulni, kidika mani balna yak, dini kidika, La yaklauwi La bahna dini kapat kalkulwas dai kat, kaput bik La ukna paskau yulwas dini as yulni sip muih as kau pat tingni kau awas karang ki. Adar diski La as dini balna kat ulwi yaknin awas kat, silak muihni kau tanka dutni karak kalyamna atnin.

Silak anin yulni la yamna kidi param laih yamwarang ki. Wingkau ulwi yakwa balna dawak muih bitik muhni yak laih apis tanitdakna karang ki, muih kulnin risnipik dawi pa muihni la kat yalahwa risnipik yulni.

Pat kalyamna muihni kidi La yamwa tuna kaupak, dawak La yamwa parasni pisni bani yak, lani yamwa pasyak awi duna karang ki.

Lanibin 35. Muih baisasa balna kidi, la satni as pas kau anin anidar dis karang ki, kaput bik, La wihta la yamwa satni as kau bik anin anidar diski. Muih baisasa balna la bahna muihni balna kidi sip silak satni pani as kau duwi kiwas karang, dawak parasni duwa anipis as apatnah amanglayang balna tingnina kau dana karang.
Adika yulni laih, La as yamna karang adika dini yulni kat.

Lanibin 36. Muih bitik kidi ramhni duwa ki, muihni nuhni, sinsni lani dawak muhni risnipik kalana atnin. Muih as bik wisnin lani kau awas karang, dutni waraunin, dawak muih awas kapat kalyamnin lani kau awas karang ki. Adika ramhni minit bayakwi yamwarang kat, la bahna as kalkulna karang dawak, la tingni kau bik bukna karang.

Lanibin 37. Kakahnil as yulni la yaklauwi pat kau rumhwa muihni kidika, muihni minit yakat manah bukwa ki. La bahna yulni pat kau rumhwa kidika, patni aslah, awaskat, uk uk libitwi kulwi yakwak, pat tingni kau kurih 30 minitkau bayakwas karang ki.

Lanibin 38. Bayakna mani kau la parasni disna as karak sip watwi yakarak yus munwi la yamwas karang, silak anin yulni la yamwa yakat manah sip karang, kaunah, silak muihni ilpni kau karang kat.

Lanibin 39. Nikarawah akat, Silak Uni tunan wawauhwa kidika muih muihni nuhni risnipik kalawi warkni yayamwa ki, dawak yaka munah ramh palnin yamnin wawalwa kidika kuduh, silak kau bukna muihni kidika tani tani sumalwi dulauwi watwi pa muihni sangnika paskau ana atnin. Tani tani sumalwi dulauwi yakarak, diparaswi kiwa ki, silak muihni kidika wanaihni karak watwi aslah kalahnin, muihni sangnika yamni dunin, skul dunin, yamni yalahnin, dawak silak uni paskau wark yamwa kidika minit bik kalwa atnin ki. Silak kau bukna yakaupak watwi di sumalwi dulaunin walwa ki.

Yayal silak kau bubukwa kidika, ahal balna sinilak uni karak wayah yakwi pa uk kau duduwa karang, dawak bik, silak main talyang idika bik, yayal balna karang.

Lanibin 40. Muih as bik albah lani kau bukwas karang. Albah lani dawi muih laihwi pa ukkau dulawi bakannin lani satni bitik kidi la yaklauwi adar kalawas ki.

Lanibin 41. Muih as bik taras yulni silak bukwas karang. Kulnin lani tuhni adi karak, laih watwas karang ki, muih as walanibis kau plun minit kalawas kat, la wihta parasni duwa as yaklauwi, la parsani minityak ilna atnin. Nikarawah walanibis, awaskat King sauni uk walanibis bik salahni yak duwa ki, ais taras duwa kat launa atnin.

Lanibin 42. Nikarawah akat, sau uk muihni as, sauni kau trabil duwa yulni dawak kingni yaklauwi usnit uywa kat, ramhni duwa ki kaiwak tanit dakna atnin. Kapahni yulni dawak kingni usnit uywak tanit daknin kidika laih, yamna karang, muihni kidika tawan yulni, pri lani yulni, la yulni dawak muih ramhni minit kalbauwa yulni kingni yaklauwi usnit uhuywa kat.

La yaklauwi muihni yak ampat tanit daknin tani balna ana karang ki, yaka bik Nikarawah king sauni uk balna karak kalpakwi yul bauwi la rawawasna balna munah. Ma sauki pas akat, tanitdakwa muihni as, sauni akaupak kangwi yaknin nitni sak karang kat, muihni yak usnit uywa kingni sauni kau laih nawatwi sihwas karang ki.

Lanibin 43. Nikarawah akaupak, pulitik awaskat, la bahna as king tingta yamwa kau kanin walwa karak libitna kat, sauni akaupak walanibis as King sauni uk kau silak anin yulni sihwas karang ki, Nikarawah lani kulwa yakat. La bahna as yulni King sauni uk kau silak kau sihnin kidi, King sauni mahni kalpakwi la yayamna munah yamna karang.

Nicaragua walanibis as bik sauni akaupak King sauni uk kau silak anin sihwas karang ki.

Lanibin 44. Muih di duwa balna, pa as kaupak dulanin sip dini, dawak dulanin sip awas U, sau, tingta yamnin dini balna kapat kidka daniwan yak risnipik kalawa ki.

Yulwa dini balna kidika pa muihni baraknin kau paraswa bahang, ramhni kalawa adika, tingta yamwi kiwa yakat, pa muihni bitik yamnini yulni nitnina pasyak kawa ki. Pa uk kau dulanin sip awas dini balna kidi La munah tingni dakyaknin sip karang ki, kaunah tanit kaupak minit yamni as launa karang.

Gabamint di dahnin warkni yamnin yulni, sau pisni nuhni warkni yayamwas dauh bang balna kidi dakyaknin yulni kat, La yaklauwa ulwi yakna karang, ampat yamnin, nuhnini, ampat launin dawi mint pakwi launin tannika bitik, sauni pisni lauwi bayaknin ahana yakat.

Muih dini yamnin dakyamknin anidar diski. Gabamint tingta yamwai muihni as adika lani minit bayakwarang kat, witin ais dini yamni duwa karak minit launa karang ki, ais dini dutni yamna bitik yulni.

Lanibin 45. Angdika muihni as talwak lani rikni akat yulwa balna kau ramhni duwa kidi mint bayakwa kat, awas kat, mint bayaknin awa kat, sip karang ki, la walnin Gabamint yaklauwi muihni nuhni tanitdaknin lani, muihni nunhni awaskat, lani rikni kau ramhni balna tanitdaknin, lani kidi sip ki walna atnin, La yaklauwi ampat yamnin tani ukwi dana yaka munah.

Lanibin 46. King sauni pas akat muih bitik kidika gabamint parasni yaklauwi tanitdakwa ki, dawak bik, muih kapat, muih bitik muihni nuhni risnipik duduwa yakat risnipik kalawa ki, muih ramhnina duwa kidi, laihwatwas risnipik kalawi, paraswi dawak tanitdakwa ki, dawak parasni kalawa ki, Adika lani nunuhni Sau Bitik Muihni Ramhnina; Muih Al Ramhni dawak Yamnin Duwa Yulni Sau Wisamni Yalahwa Pni kau yayamna kau yulwa kidi; Mukuntak baraknin, Muih sangnika Yalahwa bitik Ramhnina Yulni Sau Bitik La Ulwi yayakna kidi, dawak Sau Wisamni Yalahwa Pani Ramhnina Yulni Kaluduhwi Yayakna kau ais yulwa bitik kidi yamna atnin.

Lanibin 47. Pa dawan kalkulna ki, Nikarawah walanibis balna kurih salap minitkau tiaskau kuihna muihni balna kidi.

Pa dawan balna manah, ramhni duwa ki, adika Lani Rikni dawak la uk balna kau pulitik yulwa kidika laihwi yus munnin, kidi laih kurihni uywi kuihna atnin yulwa kidika manah ki.

Pa dawan ramhnina kidika laih watwa ki, muih trabil dutni as yamwi silak bukna kat, as, awaskat, trabil as yamna yulni la yamni bayakwi muihni yak di as as yamnin sip awas kapat la yaklauwi pakna kat.

Lanibin 48. La awi dawa ki, Nikarawah walanibis bitik kidika ramhnina papatni duwa ki, king tingta yamwa paskau kawi warkni yamna atnin, dawak ais yamnin salahni kau duwa balna bitik kidi yakat yamna atnin bik, ahal dawak yayal karak papatni palni di kulna ki.

Gabamint sauni parasni salahni yak sakki Nikarawah walanibis balna sangninaka duduwa pasyak, papatni aws lani balna bang kat, laihwi dispamnin, dawi sansni kalawak king sauni pas akat, pulitik warkni, lalahn baraknin dawi pa muihni sangnika warkni yaman atnin.

Lanibin 49. Nikarawah akat kaluduhna atnin ramhni duduwa ki, tawan nuhni dawi asangpas warkni kalahyang balna, yayal balna, wawahma sirarau, di dahwi sahyang balna, tingkau di yamyang balna, skul saran laihna balna, sins muihni balna, aiwanyang satni balna, suts muihni balna, Atlantik kus muihni balna dawi pa muihni bitik, ahni kau danin lani dis karak, ais dukih diawa kidi parasdak uywi kuihnin yulni manah, kaput munah, pa muihni sangnika wisamni as bina atnin yulni.

Adika kaluduhna balna kidi yayamna karang pa dawan balna kulninna lani kat kaluduhwi, tatuna walwi yakwa munah, pa baraknin warkni yayamwa karang, pulitik daknini, awaskat, daknini awas atnon bik sip ki, ais tingta yayamnin kukulwa yakat.

Lanibin 50. Pa muihni balna kid ramhni duduwa ki papatni king sauni tingnita pasyak kawi tingta yayamna atnin. La as yayamna karang, king sauna aiska dawi, sauna pisni as yak bik, yakarak tani duwi yamna karang.

Lanibin 51. Pa dawan balna ramhnina duduwa ki, tuna walwi yaknin yayamwa mani, tatuna walwi yaknin dawak witin yak tatuna kapat walwi papakna atnin, dawak gabamint warkni bik laihna atnin, kaunah sip ki kal laihwatna atnin, adika Lani Rikni, laihwatnin dini pakna balna yulni.

Pa dawan balna yamnin duwa ki, dakni kau kalpakwi la yamnin papaiwarang kat, La yaklauwi sansni kalawarang manah sip karang yamwas atnin.

Lanibin 52. Pa dawan balna ramnhni duduwa ki, Gabamnit Tingni Rikni Parasni balnan kau di yulna atnin, di dudutni yayamwa kat yulwi yakna atnin watwi barangni yamnin yulni kat, alas alas awaskat dakni kau kalahwi yamna atni sipki; dawak biri bik sirihni nangnit lana karang, kaput bik, sirihni isning pakna karang, ais as isningpaknin kat, ampat la kau yulwa yakat.

Lanibin 53. Sanni lani kat kaluduhwi yulbaunin kidi rispik munwa ki; adika ramhni tingta yamnin laih tanit kaupak adar yaknin nit awas ki.

Lanibin 54. Muih mahni kaluduhnin, kaluduhwi lapaknin, tapas kau kalahwi lapaknin ramhni kidika rispik munwa ki, bitik kidi La kau ais yulwa yakat.

Lanibin 55. Nikarawah upa dawan balna king tingta yamwa pasyak kanin walwa dakni paskau kanin ramhni duduwa ki, King parasni usnit uiwi laihnin tani walna atnin bik.

Lanibin 56. Gabamnit sauni parasni yaklauwi, baraknin tingta bitik paskau muih sakahwa kalna balna kau diparasna karang, dawak war kau bubukna wanaihni balna bitik kau parasna karang.

Lanibin 57. Nikarawah walanibis balna kidi, muih kapat wark kalahnin ramhnina duduwa ki.

Lanibin 58. Nikarawah walanibis balna kidi skul kanin dawi sinsni baraknin ramhni duduwa ki.

Labinin 59. Nikarawah walanibis balna muihni nuhni yamni dunin papatni ramhni duduwa ki. Gabamint yaklauwi warkni tani yamwarang, diparasnin, tanit daknin, dawi watwi sangnika dulaunin yulni.

Gabamnit parasni tingni yak sakki, muih sangnika yamni dunin warkni tunan duwi yamna atnin, dawak pa muihni balna kau diparasna karang warkni tanit daknin yulni.

Pa dawan balna sakahni yak sakki, pa ampat klin dunin lani ahawarang kidi laihwi yamna atnin.

Lanibin 60. Nikarawah walanibis balna kidi ramhnina duduwa ki, pa sangnika yamni as kau yalahnin. Gabamint parasni salahni yak sakki sau sangnika dawi sau ritsni balna mint talnin, tanit daknin dawak watwi dulauna atnin.

Lanibin 61. Gabamnit yaklauwi Nikarawah walanibis balna kau, Sangnika Yamnin Tanitdaknin ramhni kidi kalawa ki, ma sangkika dawak wark malahwa paskyak ais mai kalahwarang yulni, ampat munah yamnin kidika la ais yulwa yakat yamna karang.

Lanibin 62. Muih sakahwa kakalna balna yulni Gabamint yaklauwi di parasnin tingta satni dulauna karang, watwi muihni nuhni, sinsni lani dawak skul duna balna dulauna atnin, kaput bik tingta paskau ana karang.

Lanibin 63. Nikarawah walanibis ramhnina duduwa ki, yuh niningkauh tanit dakna atnin. Gabamint yaklauwi baraknin tingta dulauna karang di kasnin yamni duwa atnin yulni, dawak papatni sakyakwi diawa lani balna bik.

Lanibin 64. Nikarawah walanibis balna kidi ramhni duwa ki, U yamni, alahni dawak upas muihni balna barangni tanitdakwa kat kakawa atnin. Gabamint parasni yaklauwi wark yamna karang adika ramhni uywi kuihnin yulni.

Lanibin 65. Nikarawah walanibis balna ramhni duduwa ki, yakisdinin, muihni iksasais dunin, alasna dunin dawak muih uk karak kalpaknin. Gabamint yaklauwi parasna karang yakisdinin dawak iksasais satni skulni duna atnin, pa muihni balna mahni uduhwi duwi sumalwa munah, Nicaragua walanibis balna muihni
aiska baraknin yulni kat. Adika warkni laih baraknin warkni yayamni karak yamna karang.

Lanibin 66. Nikarawah walanibis balna kidi, di kalahwa yulni ramh palni kidi dakanin ramhni duwa ki. Adika ramhni pasyak kawa ki, pri lani karak walnin, dunin dawak yulni dawi kulnin lani yulwi yaknin, yul bauwa karak manah, awaskat, ulwa munah, di waya yamwa munah, awaskat, tani uk as angdika baisa yus munnin kulwarang kat.

Lanibin 67. Di kalahwa balna yulwi yaknin ramhni kidi pa muihni kau risnipik kalanin bik salahni yak sakki, dawak warkni adika yamwa ki, Gabamnit Lani Rikni kau ais yulwa risnipik yakat. Adiak ramhni duwa kidi putnin sip awas karang ki, ma takit kau ais tranibil kaiwarang yulni La munah tanit dakwa yakat.

Lanibin 68. Di kalahwa balna yulwi yakyang kamnipani balna kidi, pa muihni kau di parasnin tingta yamwa pasyakat, King sauna aiska baraknin warkni yak bik parsnin karang ki.

Nikarawah walanibis balna kidi, di kalahwa balna yulwi yakyang kamnipani kawi yus munnin sansni duwa atnin ki, dawak ramhnina dawi tanitdakwa balna kau trabil di yamna kat, laih yakwi kalyulnin ramhni duduwa ki.

Gabamint parasni kidi mint talna karang, di kalahwa balna yulwi yakyang kamnipani balna kidi, King uk sauni kaupak muihni balna tingnina yak buknin awas yulni, awaskat, dakni as kalahwi puwi duna atnin awas yulni. La yaklauwi adika tingta yamna karang.
Di kalahwak yulwi yakyang kamnipani balna, ulna kau, wing munah, wayani munah yayakwa balna, wauhtaya, misin dawak tingta kau yus munwa dini balna satni sau uk kaupak bakanwi duwi aiwa balna kidi, kaput bik, sau uk kaupak wauhtaya bakanwi duwi aiwi wauhi bakakanwa balna, wauhtaya bikis, di waya, skul wauhnitaya, sumalnin dini, ma bani ulwi yakna balna, bakanwa yulni, alkaldi, Alas yalahwa gabamnitni, dawak gabamintni rikni yaklauwi tunan minit dakwas karang.

Tunan mint daknin lani balna yaklauwi tunan duna karang. Di kalahwa balna yulwi yakyang kamnipani, gabamnit dini, awas kat dakni uk dini balna karang bik, tanit kaupak sip laih watwas karang ki. Mani as bik, trabil as kalahna wayani kapat yus munnin yulni, tingni dakyakwas karang, muih lulnin lani wauhtaya ulwi yakwa misinni as bik dakyakwas karang.

Lanibin 69. Muih bitik kidika, alas alas awaskat dakni kau kalahwi, angdika sutsni kau kulwa yamwa atnin ramhni duwa ki, muh bulah awskat muih mahni muhni kau, prias yamwa munah, tingta yamwi awaskat sumalwa munah.

Muih as bik La balna kidi yamwas dawi bayakwas karang ki, kaput bik, muih ramhni duwa balna dawi yamnin duwa balna kidi sip laih watwas karang ki, muih as kulnin lani awaskat, suts as kulnin lani karak.

Lanibin 70. Upas muihni kidika kuduh pa muihni isning palni ki, dawak pa muihni dawi gabamint parasni yaklauwi tanitdaknin ramhni duwa ki.

Lanibin 71. Nikarawah walanibis ramhnina ki, upas muihni as duna atnin. Upas muihni dini yamni balna kidi tanit dakwa ki, dawi la awi tingni dakyakwas karang dawak gabamint yaklauwi tunan mint dakwas karang. Ramhni balna adika, La yaklauwi tunan duwarang dawak tanitdakna karang.

Muihbinina kidi barangni tanitdakna karang, dawak muihbin kapat ramhni satni bitik kalana karang, kidika yulni kat, King Sauni Mahni Kalpakwi Muih Binina Lani Yayamna kidika parasni aiska duwa ki.

Lanibin 72. Marit lani dawak muih yalni kapat duwi yalahwa kidika Gabamint parasni yaklauwi tanitdakwa ki; kidika laih, al dawak yal karak yulbauwi wilin kalahwi kulnin aslah barangni kalalahna ki, dawak sip karak dakwi kalahnin witinna kulninna lani kat, awaskat as yaklauwi kapat yulwarang kat. La yaklauwi adika dini laihwi yamna karang.

Lanibin 73. Upas muihni karak kalpakwi yalahnin kidika, rispik lani, biri biri kalparasnin lani dawak papatni lani sak atnin ki, al dawak yal karak ramhnina dawak ais yamnin duwa balna bik pasyakat.

Di almuk alna kidi upas nitnina bitik barangni yamwa atnin ki, dawak walaninabis, al bu kalparaswi skul awi muhninna ki, al bupak ramhnina dawak yamnin dini duwa balna kidi papatni salahnina yak sak ki. Walanibis balna bik, salahnina yak sakki, dini almuk balna kau, risnipik kalanin dawi diparasnin. Yamnin dini dawak ramhnina yulwa laih, adika yulni La yayamna munah laihwi yamna karang.

Lanibin 74. Gabamint parasni yaklauwi muih kalsahnin mahnin lani kidika tanit dakwa ki.
Yal muihkaruk kalna mani yamni tanitdakna lani as duwarang dawak wark paskaupak ris lani kalana karang, minit duwa yakarak, kaput bik, muihni sangnika tanit daknin yulni bik minit kalana karang ki.

Muih as bik yal as muihkaruk yulni tingta yamnin kalawas atnin sip awas karang, dawak muhkaruk kalna mani awaskat, muihbin duwi bayakna mani sip tingta pani kaupak kangwas karang ki; bitik kidika La munah laihwi yamna karang.

Lanibin 75. Muih walanibis bitik kidi ramhnina papatni duduwa ki. Wanaihni ayangni pakwa yak, ahni pirini kau danin lani dis karang ki. La bitik pasyakat, walanibis as as kau baisa nuhni awaskat papatni awas lani balna yayamwa karang kat, as bik parasni dis karang ki.

Lanibin 76. Gabamint parsani yaklauwi muih baisasa balna tanitdaknin yulni baraknin warkni lani satni dulauna karang ki; adiak pasyakat ramhnina duduwa karang ki, tanitdaknin, minittalnin dawak skul kalana atnin ais nitni yakat, wanaihni balna, Pa muihni dawak gabamint parasni yaklauwi.

Lanibin 77. Muihbarak balna kidika ramhnina duduwa ki, tanitdakna atnin, wanaihni, Pa muihni dawak Gabamint parasni yaklauwi.

Lanibin 78. Gabamint parasni yaklauwi papang dawak itang lani yamni yayamwa kidika tanitdakwa ki. Papangi awaskat itangni pa tannika walwi talnin ramhni bik la ni ulwi dawa ki.

Lanibin 79. Walabis as walanibis kapat duwi muhnin ramhni kidika la kau ulwi dawa ki, muihbin kidika muihni nuhni aiska yamni baraknin palni yulni. Lani yaklauwi laihwi barangni yamna karang.

Lanibin 80. Tingta kalahnin kidi ramhni as ki, dawak pa muihni baraknin salahni yak sak ki. Nikarawah walanibis balna wark kalahnin kidika munah kuduh, pani muihni dawak muih balna nitnina barangni yayamwa kidika, dawak King sauni ritsni dawi baraknin lani dukauwa ki. Gabamint yaklauwi trai talwarang, Nikarawah walanibis balna bitik kau diawak tingta yamwi minik yakwa karang, dawak muih kapat ramhnina diawak wark yayamwa karang.

Lanibin 81. Tingta muihni balna kidi ramhnina duwa ki, kampani tunan dunin pasyak kawi wark yamna atnin, witinna kaluduhna duduwa munah dawak La ais yulwa yakat.

Lanibin 82. Tingta muihni balna kidi ramhnina duwa ki wark as kalahwa kat adika yamnini balna duwa atnin:

1.- Minit papat duna atnin, sim warkni yamna yulni, dawak tingta pani yamnin bik papatni duna atnin, pa muihni paskau ais tingta yamwa lani yakat, pirini kau danin lani dis karang ki, King tingta yamwa pasyak kanin walwa yulni, sutsni yulni, pa muihni as yulni, al awaskat yal kidika yulni, awaskat, di uk yulni karang bik, dawak tingta kalawak sangnika yami duwi muih kapat yalahna karang.

2.- Minit launa karang ki, parasni duwa lalahni karak dawak, tingta yamwa pani kat.

3.- Tingta yamwa minit dibin palni dawak sangnika tanitdaknin dakwa balna kidi sip laih watwas karang ki, kaunah unipas muihni balna tanidaknin yulni laihtak, dawak bik la munah yamna karang ki.

4.- Tingta pani yamni as dunin karang ki, muihni nuhni, muihni sangnika, muihni klinni dawak warkni yamwa kaupak sangnika kau trabil kalyamnin niningkau tanitdaknin lani balna duwa atnin ki.

5.- Yingta mani as awar tiaskau bas duwa karang ki, sandi bani ris dunin, bakisan mani, King sauni aiska kau tingta dis mani kidi minit lauwi kalanin karang ki, kaput bik, waiku salap minit kau bas minit bik kalanin karang ki, bitik kidika La ais yulwa yakat.

6.- Tingta pani yak nining wark duwa atnin sansni kalanin, tingta baisa yamni kau ilnin sansni papatni duna atnin ki, yaka pasyak di uk talwas karang ki, ma ampus tingta kalahna kidi, warkni yamna, wark yamni yamwa tannika dawak kasuk palni yamwa tannika balna manah.

7.- Sangnika aiska tanitdaknin ramhni dawak kaswi sangka yalahnin dini balna bik kalanin, di sip awas kalahwarang, muihbarak kalwarang mani, tingta kaupak sakahwa kalahwarang mani, siknis kalwarang awaskat, muihbin dunin mani balna yak ilp duini yulni; kaput bik, wanaihni as dauwarang mani yus munnin yulni, bitik kidika ampat dawak ais yamnin kidika La munah yamna karang ki.

Lanibin 83. Tingta laihwatnin ramhni kidika kalawa ki.

Lanibin 84. Muih baisasa balna tingta kalahnin anidar diski, muihni yamni baraknin kau awaskat, skulni kawi baraknin kau kakahni kalyamnin tingta balna kapat kau. Muih binina dawak Apis bararak balna kau tanitdakna karang wark awi waraunin, awaskat, minit launin kau waraunin awas yulni.

Lanibin 85. Tingta muihni balna kidika, skul dunin, sinsni lani baraknin, tingta tannika lan kalnin ramhni duwa ki; Gabamint yaklauwi tingta tani satni karak parasna karang.

Lanibin 86. Nikarawah walanibis bitik kidi ais skulni dunin dawak ais tingta kalahnin kidi walwi dunin ramhni duwa ki, dawak tingta pani as walwi duna atnin, yaka pasyak skulni saran laihna wauhnitaya manah nit karang, dawak pa baraknin dini as yamwa atnin.

Lanibin 87. Nikarawah pas akat tingta muihni kaluduhnin ramhni param duwa ki. Tingta muihni balna kidika alas kulnin lani kat, tingta kaluduhna balna yamnin sip karang ki, dawak adika bik, La kau ais yulwa yakat yayamna karang ki. Tingta muihni as kau bik, taihwi kalyamwak, tingta muihni kaluduhna as pas kanin anidar dis ki, dawak kaluduhna as paskau sak yakaupak bik kalyamwak dawi kalahnin anidar dis ki. Tingta muihni kaluduhna balan alas lanina duwi tingta kalahnin ramhni kidi rispik munwa ki, dawak tingta muihni kaluduhna parasni kidi rispik munwa ki.

Lanibin 88. Tingta muihni balna ramhnina laih watnin sip awas dini balna kidi tanitdakwi rispik munwa ki, yaka munah, muihni bani awaskat, daknini yamnini tanitdaknin, kidika yulni kampani daniwan karak ayangni rawawasna karang:

1) Muih alas alas kannitrak.

2) Daknini yulbauwi barangna lani. Bupak pasyak, la ais yulwa yakat yayamwarang.

Lanibin 89. Atlantik kus pani binina balna kidi Nikarawah pani sahyaknin sip awas pisni as ki, kaput bahang sim ramhnina duduwi, dawak ais yamnin dini balna bik papatni duduwa ki.

Atlantik kus kau pani binina kidi ramhni duduwa ki, sara mani kaupak sulani laniduduwa kidika tanitdakwi barakna atnin, King sauni aiska aslah pas yakat; Alas ampat kaluduhnin lani duwa kidi yus munna karang dawak witinna dinana kidi tunan duna atnin, witinna sara mani kaupak ampat yalalahwa dai lani kat.

Gabamint yaklauwi Atalntik kus kau pa binina kidi ampat saunina duwi daniwan kalwa lani kidika rispik munna karang. Kaput bik, wasni dawi asangnipas sangnika yus munwi, yamnini dunin yulni bik rispik munwa ki.

Lanibin 90. Atlantik kus kau pani binina kidi ramhnina duduwa ki, tunina yulnin, sinsnina dawak yalahwa tannika pri lani duduwa atnin. Yalahwa tannika dawak, kulninna lani balna kidi, King sauna aiska yalahwa tannika yak baisa parasni ilwa ki. Gabamint yakaluwi baraknin warkni dulauna karang, adika ramhni laihwi yamnin yulni.

Lanibin 91. Gabamint salahni yak duwa ki, La satni balna ana atnin, yakarak kalawak Nicaragua walanibis as bik, tuni yulwa, yalahwa tannika dawi sulanini yulni di dauh kapat pirini kau lanin awas yulni.

Lanibin 92. Nikarawah Suku turukyang balna kuduh, gabamint araknibus tingni parasni ki, King sauni daklana, alas gabamnitni parasni dawi sauni aiska uduhna adi tanitdaknin yulni.

Di tannika aslah aslah yulni manah laih, Nikarawah Tatuna King kidi, gabamint tingni parasni duwa karak kaluduhwi yulbauwi talwi, sip karang ki, Nikarawah Suku turukyang balna, Tingparah yak di parasna atnin, kaunah kidika bik King sauni aiska pasyakat trabil mahni yaklauwa karang kat, pat nuhni balna awaskat, sau daukalwa kakahni balna kapat kalahwa mani yak.

King sauni pas akat, King sauni uk kaupak suku turukyang ai kawi pani duwi wark yamnin anidar diski. Sip karang adar parahni kalanin kuma kuringni, wing tinima, dawak war misinni satni balna King sauni uk kaupak, ai kawi muih sangnika kau ilp munnin tingta kapat balna laihtak, kaunah kidika bik, Ma sauki kingni yakaluwa yulna karang, dawak King sauni aiska lani yamyang parasni yakaluwi anidar kalawarang laih tak sip karang.
Lanibin 93. Nikarawah sukuni turukyang balna kidika, King sauna aiska tingni parasni ki, arakbus warkni palni duwa ki, pulitik daknini dis ki, adar kalawa kat yamwi, yulbauwi talwi lik awas ki.

Suku turukyang muihni balna kidi tawan yalahnin tannika dawi muih ramhnina yulni sumalwi ridi yamna karang ki. Suku turukyang warkni pasyakat, la bahna awaskat kakahni bikisni yamna kat, dawak suku turukyang muihni as yamna kat, suku turukyang Lani wihta yakaluwi lani yayamwarang, ais la yulwa yakat.

Suku turukyang muihni as, La as bahna awaskat kalahni bikisni as yamna kat, La wihta aihwa balna yakalauwi lani yamna karang.

Mani as bik, pa muihni as kau, suku turukyang lani wihta as yaklauwi lani yamwas karang.

Lanibin 94. Nikarawah sukuni turukyang dawak Tingparah muihni balna kidi King tingnita dawak king tingnita pasyak kanin wawalwa daknini tingta kapatnah yamnin sip awas karang, dawak kapatnah kaluduhna as kau wark pani dunin sip awas karang. Kaput bik, muih walwi yakwa munah tingta pani as dunin walwi yayakwa kapatnah kau kanin sip awas karang, witin suku turukyang awaskat tingparah kaupak dawi kalahwas ban tingta yamwa kat, dawak bik, angdika liksan ni kau kanin kulwa kat, baisa kurih as tanit kaupak, tingta yamwa kidi dawi kalahna atnin ki.

Adika tingta muihni balna pasyakat, kaluduhna lani, tingta pisni, tingta yamwa, tingta yamwa pisni, tingta pani kaupak baisa ma kau ilnin, tingta kau muihbarak kalna lani dawak tingta yamwi baraknin tannikka bitik kidika, kidika lanina kau ais yulwa yakat yayamna karang.

Lanibin 95. Nikarawah sukuni turukyang balna kidi, tingta yamna karang, king sauni aiska lani rikni kau ais lakna yakat, dawak yakat rispik munna karang dawi ais yulwa yakat ulni dakana karang. Tawan muihni parasni dinit kau kana karang, dawak Nikarawah Tatuna nuhni King yaklauwi tunan duna karang, Nikarawah sukuni Turukyang Tanituna Nuhni Palni kapat, awaskat gabamint anipis parasni duwa as munah.

King saumi pas akat, sukumi turukyang dakni uk as dis karang ki, dawak bik, sukuni turukyang tingta yamwa parasni satni balna bik dis karang, la yulwa yaihnit yakat.

Lanibin 96. Taihwi diyamwak suku turuknin tingta paskau kanin Lani diski, dawak adar dis ki, taihwi diyamwi Nikarawah sukuni turukyang dawak Tingparah tingniuta pas kau kana atnni.

Suku turukyang daknini, dawak tingparah balna dawi, gabamint anipis as kau bik adar kalawas ki, pulitik yulni muih usnit uywi pakwi talnin.

Lanibin 97. Tingparah balna kidi ma sauki aiska, pa muhni suku turukyang ki. Tingta palni kidika kuduh, tawan pasyak barangni duwa atnin, pa dawan sangnika tanitdaknin, la bahnin tanit kau laihwatnin dawak, usnit uynin, dawak di uk balna bik, ais La yulwa yakat. Tingparah witin tingnita kat yamwa ki, tingparah daknini as dis ki, yulni kat dakawa ki, yulbauwi talwi lik awas ki. Tawan muihni parasni dinit kau kana karang, dawak King Tatuna nuhnu King yaklauwi tunan duan karang, Nikarawah Suku Turukyang Tanituna Nuhni Palni kapat, awaskat gabamint anipis parasni duwa as munah.

Tingparah tingnita yamwa pasyakat, La yamwa parsani duwa yak di paraswa karang. Tingparah tingta yamwa paskau kaluduhna tani balna kidi ampat paskau di sumalwi sahyakwi warkni yamwa yakat yayamwa ki.

Lanibin 98. Gabamint parasni kidi lalah warkni yamwa pasyakat tingta palni duwa kalaih, King sauni kidi kalawak barakna atnin; barakdas lani dawak sara mani kaupak muih uk kau tani ada lani kidi dispamnin; pa muihni sangninaka baisa bitar yamnin dawak ritsni balna ma ani yak baisa papatni sakyakwi diana atnin.

Lanibin 99. Gabamnit parasni kidika, tingni yak sa ki, King sauna aiska kalawak barakna atnin, dawak muih bitik yamnini tani walyang kapat, muih bani, pa muihni, dakni balna, sau pisni dakna balan bitik nitnina barangni yamnin yulni tingnita yamwa karang ki. Gabamint parasni salahni yak sak ki, di daniwan kalahwa lani kidi tanitdaknin, parasnin dawak dulauna atnin, kaput bik, lalah baraknin tani, dakni as kamnipani, dawi gabamint kamnipani balna, di dahyang kaluduhna, pa binina kaluduhna satni bitik kidi di parasna atnin, lalah dawak pa muihni baraknin kidi kalpakwi tingnita yamna atnin.

Mukuuntak baraknin warkni yamnin bitik kidika pa muihni balna tingnita palni ki. Pa muihni dakni satni balna tingnita parasni yamwa kidika risnipik kalawa ki, kidi pasyak bang ki, pahna lani kau taldarang kat, kampani nunuhni, apis nunuhni dawak bikikisni bik, kampanibikis, didahyang kaluduhna kamnipani, kaluduhna uk uk bik.

King Mukuntak Pani Rikni kuduh gabamint tingnirah parasni duwa ki, lalah tannika tunan duna atanin. Gabamint bankni balna, dawak gabamint lalahni wauhyang anipis uk balna bik, mukuntak baraknin tingta yamyang balna karang, wark kau mukuntak awi baraknin tani walwa atnin, lalaj satni kau sahyakwi lin munwa karang, baisa palni laih, di dahyang binina dawi papus muihni balna kau di parasnin yulni. Gabamint salahni kau sak ki, tingta dawas palni, tingta yamwi tanitkau barakwi kiuna atnin. Gabamint yaklauwi pri lani kalawa ki kampani dawi bank balna warknina yamnin, kaput bik lalah warkni yamyang anipis uk balna bik, dakni as dini awaskat gabamint anipis balan karang bik, bitik kidika l amunah yamna karang. King sauni uk karak di bakannin tingnita, dini tanitdaknin dawi baisa yamni tanitdaknin, gabamint dawak kampani uk dini karang bik, biitk kidi la munah yamna karang ki.

Lanibin 100. King sauni uk kaupak kaiwi yingta yamnin lalahni awarang kidi yulni, gabamint la as ana karang ki, yaka munah, King sauni adika lalahni dawi pa muihni barakni lani kau di parasnin yulni, King sauni daklana akat uswas tingta yamna karang.

Lanibin 101. Tngta muihni balna, dawak tingta dulauyang daknini uk balna bik, mukuuntak baraknin tingnita ridi yamnin, tingnita yamnin dawak dulaunin ramhnina duduwa ki.

Lanibin 102. Sau ritsni balna kidi King sauni aiska dini balna ki. Sau ritsni balna tanitdakwi yus munnin, baraknin dawak ritsni balna yaknin kidi Gabamint parasni tingni yak sakki; dawak witin sip karang ritsni balna yakwi yus munnin kannitrak rawasna atnin, King sauni nitni kapat duwarang kat.

Lanibin 103. Gabamint yaklauwi tanitdakwa ki, pri lani kat di dawan satni balna kidi bang atnin, gabamint dini balna, muih as dini, di dahyang kaluduhna dini, pa binina aslah kalahna dini balan bitik; kidi bitik uduhna yak, lalah baraknin tingta satni kau kalahwa ki, King sauni yamnini nuhni dinit yak bang ki, dawak pa muihni baraknin warkni as yamwa ki.

Lanibin 104. Kampani balna, adika Lani Rikni kau, di dawan kalnin satni pakwa as kau aslah kalahwi wark yamwa kidi, La muhni kau, dawi gabamint lalahni tingta yamwa muhni yak papatni kalkulna ki. Lalah baraknin tani walnin kidika pri lani duwa ki. Lalah baraknin tingta yamnin kidika barangni dawak yamwa karang, laihwatna lani as bik dis karang, pa muihni dawak King sauni aiska yamnini yulni. La ahana karang kidika manah.

Lanibin 105. Gabamint parasni salahni yak sak ki, pa muihni yus munwa dini balna, pawa yaringni, wayalis yulnin, was, truk, truk kira tani, plin bukwa pani minit yus munnin balna kidi dulaunin, diparasnin dawak launin praisni ana atnin, kaput, amuihni balna yus munnin yak laih watwas karang ki. Kampani tingta baraknin mukuntak awa balna kidi, dawak sau ritsni balna, sauni pisni balna yak amput yakwarang balna bani yak, lani kat yamwi duwi yamna karang ki.

Skul kalanin, muih sangnika tanitdaknin balna kidi, gabamnit salahni yak duwa ki, dawak, yamwas danin sip awas karang ki, dawak salahni yak sakki, muih bitik yak diana atnin, ahni kau dawas, baisa bitar dawak apahni yaman atnin. Adiak warkni yamwa uni dawak dini balna, gabamint dini kidi, sip tingni dakyakwas karang.

Muih miniknakunni muihni balna yak muihni nuhni yamnini kidi minit dis duna karang, yaka pas yak baisa parasna karang, itang muihbin dunin tingta balna yak. Gabamint yakalauwi muih muih muihni nuhni dawak skul tingta yamwa balna kidi, nining baisa apahni dawak diparaswa karang. Ma muihki nuhni yamnini dawak skul tingta yak, kampani uk balna tingta yamnin ramhni kalawa ki.

Gabamint salahni yak sak ki, pa muihni di yus munwa dini bitik kidi, minit talwak yamni atnin, kaput bik, muih balna bulah duwi minit nuhni ilnin awas yulni tanitdakwa karang ki.

Lanibin 106. Gabamint di dahnin tingnita dulauwa kidika munah kuduh, pa muihni balna sau dawan kalnin dawi barangni lani kat sau sahyakwi diawa tani duduwa kidi, kaput bik, King sauni pas akat sau sangnika dulaunin warkni dawi, sau baraknin tingta yamnin tani palni duwa ki. Gabamint sau warkni yamwa pasyakat barangni duwa karang muih al dawi sau karak ampat biri biri kalparasnin nitni duwa kidi; kaput di paraswa ki, di dahyang balna saunina duduwarang kidi adika lani munah.

Lanibin 107. Gabamint di dahnin tingta dulauwa karak, muih sau mahni dakwi duwi tingta yamwas kidi, diswi kiwarang ki, dawak gabamint sauni karak libitwi aslah yamna karang. Sau nuhni daklawi warkni yamwas dauh duduwa kidi, tingni dakyakwi kiwa pasyak, di dahayang sauni as kau kakahni kalyamwarang kat, adika Lani Rikni, lanibin 44 kau yulwa yakarak laihwi yamna karang.

Gabamint di dahnin tingta dulauwa akarak, di dahyang dawak indian sulani balna kau di taihwi diayamwa lani bitik dismukwarang ki, dawak King sauni paskau, dawi adika Lani Rikni kau ampat baraknin sip balna lani ulnas yakat, pa muihni balna kau sau diana karang. Indian sulani sauni duwi daniwan kalahnin kalaih, lani wisamni ulwi yakwarang munah yamna karang.

Lanibin 108. Sau dawan balna, angdika balna kasuk warkni yamwi minik yakwa balna yak, risnipik kalana karang ki. La ulna pasyakat, apatnah ramhnina bik tanitdakna karang, gabamint di dahnin warkni dulauawa kau uywi kuihni walwa dini balna yamnin yulni kat.

Lanibin 109. Gabamint yaklauwi di parasna karang,di dahyang balna alas kulninna lani kaluduhnin tingta yayamwa yak, ahal pa awaskat, yayal yulni pirini kau lawas karang ki, dawak tingta yamnin dini duwa yakarak di parasna karang ki, di dahwi yaknin tannika baisa amanglanin skulni duinin yulni kat, kaput munah di dahyang balna sangnika yalahwa lani kidi baisa bitar dulaunin yulni.

Lanibin 110. Gabamint yaklauwi diparasna karang, di dahyang binina dawi apis papus balna bik, King sauni aiska dawak pa muihni baraknin tingnita ridi yamwa pasyak alas kulninna lani kanin wawalarang kat, kaluduhwi aiwarang awaskat, alas alas aiwarang bik diparaswarang ki.

Lanibin 111. Di dahyang balna dawak di minik dulauyang daknini uk balna bik, di dahnin tingta wisamni wirlanin ridi yamwa pasyakat kawi tingta yamnin ramhni duwa ki, witinna kaluduhna duduwa munah.
Lanibin 112. King Sauni Aiska Tingnita Yamnin Mukuntak Lani kidika kurih as dini ridi yamwa ki, dawak tingnita palni kalaih, gabamint tunan wauhwa yak, lalah ampus kawa kidi dawak kalahwi kiwa tingta yamnin yulni ridi yamna ki. Gabamint Tingni Rikni Parasni balna lalah ampus yus munnin sip karang kidi La yaklauwi awarang ki, dawak bik, angkaupak llah ai kawa dawi angkat yus unwa dini balna bitik niningkana karang ki, angdika biri biri kapapat balna kidika.

King Sauni Aiska Lani Yamwa Parasni kidi, Wark Mukuntak Ampus yus munnin ridi yamwi Prisidinti sihwa kidi sip karang ki sat uk wirlana atnin, kaunah, di wisamni uk kau lalah disnin yulni laih yamnin sip awas karang, la munah laihtakat, kaunah kidi bik, sim mani yak, lani yamnin dawak minit paknin karang ki, lalahni anin yulni. King Warkni Lalahni Ridi Yamnin Lani yaklauwi adika dini yamna karang.

King Sauni Aiska Tingnita Mukuntak kidi sat uk wirlanin kat, taras balna kidi am kau ilnin awaskat parahkau laknin karang kat, lalah kawa kidi awaskat gabamint anipis biri biri lalah lawi tingta yayamwa balna kidi parahkau laknin kat, King Sauni Aiska Lani Yamwa Parasni yaklauwi barangni yamnin karang ki. Kurih bani Tingta Yamnin Mukuntak Ridi yamwa Lani kidi sip awas karang, di tunana minit launin wisamni yakna atnin.

Lanibin 113. Tatuna Nuhni King tingni yak sak ki, Kurih bani Tingta Yamnin Mukuhtak Lani kidi Ridi Yamnin, dawak kidika King Sauni Aiska Lani Yamwa Parasni tingni yak kalana karang barangni yamna atnin, yaka lani kau ais yulwa yakat.


Kurih bani Tngta Yamnin Mukuntak Lani Ridi Yamwa kidi pasyak duwa atnin ki, King Sauni Aiska Lani Yamwa Parsni kidi amanglanin yulni, Gabamnit Tingni Parasni dawak gabamint kamnipani tingta Mukuntak balna bitik.

Lanibin 114. King Sauni Aiska Lani Yamwa Parasni tingni yak sa ki, dawak parasni duwa uk tingni kau sip lawas ki, di tunan minit launin kidi paknin, barangni yamnin, sat uk wirlanin, awaskat dispamnin. Di Tunan Minit Daknin Anipis kidi kulwi duwa atnin ki, ritsni lani dawi tunan mint yakwa balna ampat sahyakwi yus munnin tannika kidika.

Di tunan minit launin, tingni kaupak di daknin lani kapat balna kidi anidar diski.

Tunan minit kulwas karang ki, panabas balna kapat, indiksan wasni, a parasnin wasni muih yus munwa dini balna, dawak wakalni bahwak birnin unitak balna kapat, dawak kidika dini balna yamnin yak yus munwa dini balna bitik, kidika bitik laih, lamina bani kau ridi yayamwarang munah laihwi yamna karang.

Lanibin 115. Di tunan minit daknin balna kidi, kidika warkni yamnin yulni La ulwi yakwi minit pakwarang ki, dawak lalauwa muihni yak bik tanitdakna karang. Gabamint yaklauwi muih as kau taihna lani karak yamwak di tunan minit lauwas karang, La ulna paskau yulwas kat.
Lanibin 116. Skul lani karak walwa kidika kuduh Nikaragua walanibis balna muihni dawak sinsni aiska diawak barakna atnin; kulnin lani apahni diana atnin, sins lani tuhni dawak muih yak dalani talnin; muihni nuhni yamwa balna dawak muihni risnipik dulaunin, dawak ridi yamnin karang ki, King sauni aiska baraknin yulni ais nitni duwa balna kidika tingta laihwi yamnin yulni; kidika bahang, skul lani kidika muih bani dawi pa muihni yalahwa bitik, sat uk wirlanin dawi baraknin yak rikni nuhni palni ki.

Lanibin 117. Skul lani kidika kuduh tingta yamwa tani aslah ki, kulnin pri warkni yamwi, di wisamni biwi dawak kalpakwi yamwi, yul kulwa balna dawi di yamwa karak libitwi yamwa ki, ting kau yamda dini balna kidi sinsni lani dini karak libitwa ki dawak sins tuhni tannika walwi talnin tingnita paraswa ki. Ma sauki pas risnipk dini kau kalparaswa ki, sara mani ma yulki balna dai karak libitwa ki, ampat yalahda tannika kat, ma sauki tannika dawi au aiska tannika bik, kaput bik sins tuhni lani dawi tingta yamnin sinsni nining barakwa bik libitwi; Nikarawah walanibis kapat bik risnipik lani balna baisa dulaudi, adika Lani Rikni kau aisi yulwa yakat, kaput bik, kalada kat baisa tuhni kau laihwi talwi kiunin ki.

Lanibin 118. Gabamint parasni kidika, di paraswa ki, pamali balna, pani bin dawak pa muihni bitik skul lani tingnita pas yakat kawi parasna atnin, kaput bik di kalahwa balna yulwi yaknin kamnipani balna yak sansni kalawa ki di parasna atnin yulni.

Lanibin 119. Skul lani kidi gabamint tingnita palni ki, dawak sip dawas karang ki. Wiitn tingni yak sakki, tingnita ulnin, tunan dunin dawak ridi yamnin. King sauni aiska kau skul lani tingnita yamnin kidika paskau aslah uduhwi duwi warkni yamwa ki, King sauni aiska warkni ridi yamwa pasyakat. Ampat ridi kalahwi dawi tingnita yamwarang tannikka kidi la munah yamwa ki.

Gabamint salahni yak sakki, skul tingnita kalahyang dawi tingnita muihni palni balna yak, di tanka mahni kau sumalnin dawak ridi yamna atnin, King sauni aiska adika kalawak baraknin dawak sat uk wirlanin yulni.

Lanibin 120. King sauni aiska paskau skul sumalyang balna tingnita palni ki, sinsni lani wsiamni yakwa tingnita dawi skul sumalnin sinsni lani tingta yamna atnin. Skul sumalyang balna kidi ramhnina duwa ki sangnika yamni dunin, dawak tingta yamni yamwa risnipik lani kat yalahnin, kaput bik, tingta baisa ma kau ilna karang dawi yamni diyamna karang La kau ais yulwa yakat.

Lanibin 121. Skul lani dunin kidi Nikarawah walanibis bitik kau Pri ki dawak papatni ramhnina duduwi. Primaria skulni kidi minit diski, dawak gabamint skulni uni balna kau brangni kalyamwak kanin karang ki. Secundaria skulni kidika gabamint skulni uni balna kau minit dis ki, kaunah, pri ki papang balna kulninna lani di parasnin kulwarang kat. Mukuntak kakahni yulni, muih as kau bik, gabamint skulni uni kaupak kangwi yakwas karang. Indian sulani balna dawi Atalntik Kus kau sulani satni pani binina kidi, sauna pasyakat ramhnina duduwa ki, yalahwa satnitanikka kat itangni tuni kau skul sumalna atnin, ais La kau yulwa yakat.

Lanibin 122. Muihbarak balna kidika sansni duduna karang ki, di yamnin sip parasni duwa kidi diawak bsrakna atnin, sumalnin lani satni balna karak. Gabamint sumalnin warkni yamwi kiuna karang ki, wauhtaya yulwi talwas lani kidi dispamnin yulni.

Lanibin 123. Skul sumalnin uni, gabamint dini awas balna kidika, sumalnin satni bitik kau yamnin sip karang ki, bitik kidika adika Lani Rikni kau ais yakat duwi yamna karang.

Lanibin 124. Nikarawah akat skul lani kidi suts tingni paskau awas ki. Gabamint rispik munwa ki, gabamint skulni awas balna skul sumalnin tingnita yayamwa kidi, dawak kristian daknini skulni uni kat, Suts yulni bik pakwi sumamalwa kidi risnipik kalawa ki.

Lanibin 125. Universidad balna dawak Skul Uni Nunuhni uk balna bik, alas lanina kat skul sumalnin ramhni duduwa ki, kaput bik, tingta lalahni, anispis satni sahwi dunin dawak tunan dunin tingta balna alas awi dunin ramhni duduwa ki, ais la yulwa yakat.

Tingta yamwa yulni, gabamint kau, Alas lani gabamintni kau dawak alkaldi balna kau tunan minit launin as bik dis karang ki. Yamnini dawak minit yayakwa kidi, kawi laihwi talwi tingni dakyaknin sip awas karang ki, kaunah, sip karang ki yamna atnin, Kalahni balna kidi muih karak, kampani dawi tingta yulni kantrak munah yayamna kat.

Universidad skulni sumalyang balna, skluni muihni dawak, tuna wauhyang balna kidi, universidad yak kawi tunan dunin ramhni duduwa ki. Universidad balna dawak Skul Uni Nunuhni uk balna bik, La kau yulwa munah, Gabamint yaklauwi tingnita lalahni dianin balna kidi, kurih bani duna karang, King Sauni Aiska Tingta Mukuntak kaupak, 6% kiidka, dawak kidika bik, La kau ampat yulwa yakat sahyakwi diana karang. Gabamint yaklauwi yaka Universidadni dawak Skul Uni Nunuhni uk balna yak, sip karang minit pakwi lalah karak parasna atnin, tingta minit pakwi yamwi mukuntak baisa yus munnin nintni duduwa karang kat.

Skul nununhni sumalyang balna kidi pri lani duduwa ki, ampat sumalnin lani ridi yamwarang kidi. Gabamint yaklauwi tanitdakwi paraswa ki, di wisamni pri yakna atnin, sins lani walwi talwi sumalnin, dawak tunan ba kaupak di wisamni yakna kidi tanitdakwa akrng.

Lanibin 126. Gabamint salahni yak sak ki, King sauni aiska yalahwa lani kidi laihwi dulaunin, kalawak baraknin dawak parasni yamna atnin, bitik kidi pa muihni balna paskau kawi di wisamni biwi uywa munah.

Gabamint di paraswarang ki, King sauni aiska yalahwi barakwa lani satni bitik kidi, kaluduhwi yyamwa dini awaskat alas alas kalahwi di wisamni bibiwa balna kidika bik.

Lanibin 127. Tun ba kaupak dawak yalahda lani balna pasyak bik di wisamni walwi yaknin lani kidi pri lani duwa ki, dawak laihwatnin lani dis ki. Pa muihni yalahwa lani warkni muihni balna kidi pri lani duwa ki, ampat tannika dawi tani munah kulnin lani balna yul yakna atnin. Gabamint di paraswarang ki, tingta yamwi yayakwa kidi muih kau niningkana atnin dawak, yamna muihni yak di dawan kapat tanitdakwa ki.

Lanibin 128. Gabamint yaklauwi tanitdakwa ki, King sauni pas akat, sara mani kau di bibina pisni balna, sara mani yulni, tuni yulwa, yalahwa tannika dawak tun ba kau di yayamna balna kidika.

Lanibin 129. King Sauni Lani Binin Parasni, Gabamnit Tingta Wauhnin Parasni, Gabamnit Lani Laihwi Yamnin Parasni, dawi walwi yakni Tunan Wauhnin Parasni, balna kidi biri biri alas alas parasnina duduwa ki, dawak kalpakwi tingta tunan wawauhwi, dawak King sauni aiska nintnini dawi adi Lani Rikni manah dinityak abukwi tingnita yayamwa ki.

Lanibin 130. Nikarawah kingni sauni adika Pa Muihni Ramnina munah King sauni Parasni awi duna ki. Tingta as bik, warkni yamwa muihni yakat, tingta yamwa minityak baisa parasni pakwi kalawas ki, adika Lani Rikni dawak La balna kau ais yulwa minit yakat.

Gabamint tingnita tunan wauhyang bitik kidi, baisa tingnita laihwas tanityak, dawak dawi kalahwa mani yak, ais yamnini duwa balna kat niningkana karang ki. La yaklauwi adika dini laihwi talwa ki.

King Sauni tingta Yamwa Parasni as, tingnita kalahyang bani kidi, pa muihni yaklauwi muihni kat, awaskat sat uk munah walwi yakna balna kidi, Gabamint Tingni Rikni Tanituna dawak Usnit balna bik, Gabamint Anipis satni Tanituna balna, dawak King sauni uk kau sihwak Nikarawah Gabamintni ayangni kau tingta yayamwa balna bitik kidi, gabamint kaupak anidar as bik duwas kaang ki. Minit yakat, gabamint kamnipani awaskat, daknias kamnipani, ma sauki pas akaupak, awaskat King uk sauni kaupak dini balna pasyak kawi tunan dunin awaskat, tani walyang kapat warkni yamnin anidar dis, gabamint karak kantrak yayamwa mani, gabamint warkni muihni kapat. Adika lani minit bayakwarang kat, kantrak yamwi yamnini duna balan kidi bitik diswaran, dawak, muihni kidika warkni kaupak yakna karang.

King Sauni Lani Binin Parasni daknini paskaupàk, muihni papusdak minit kau Apis karak sip karang Tunan Nuhni King La kal laihnin awas parasni duwa kidi tingni dakyaknin. Gabamint warkni kalahyang uk balna yak laih, sip karang, daknini kaupak papusdak karak yakpamnin. Adika tani munah yamwas karang laih, adika Lani Rikni munah, gabamint warkni tunan duyang balna, La kal laihnin awas parasni duduwa balna yak, laihwi silak anin dawi la anin sip awas karang ki, kaunah pamalini dawak tingta yulni laihtak sip karang La ana atnin. La kal laihnin awas parasni kidi sip ki muihni yaklauwi dapamnin. La yaklauwi adika dini barangni yamna karang.

Sauni Tatuna Nuhni King dawak usnit bik, La laihnin awas parasni duwa kidika tingni dakyakna mani, lani yamnin parasni duwa kalaih La Barangni Wihta Rikni daknini muihnni bitik kaluduhwi.

King Sauni Tingnita Yamwa Parasni duwa anipis bitik kau, dawak adika Lani Rikni munah gabamint anipis apapahna bitik yakat, kalawak warkni tunan duwa muihni yakalauwi wanaihni yaihnit palni muihni yak wark kalanin ayangni paknin sip awas karang, tatuna parasni duwa kaupak bik sip awas karang pakna atnin. Apis tunan duyang nunuhni balna tingta kalanin pasyakat, adar diskarang kalwanaih palni balna muihni, ani duwa pasyak, sulani arungka kat, dawak marit munah wanaihni laih, sulani bu pitni kat, tingta tuna pakna atnin.

Pa Muihni Warknina Yamnin Lani, Tngta Pani Tunan Wauhnin Lani, Sumalnin Tingnita Lani, La Wihta Tingnita, King Sauni Uk Gabamint Tingta Yamnin Lani dawak kapapat lani uk balna yak laih, anidar dakyakwa lani kidi dilaihwas karang.

Lanibin 131. King Sauni Aiska Tingta Yamwa Parasni arungka sahyakna warkni muihni balna kidi, pa muihni balna muhni yak warkni yamni yamninna ki, dawak, Apis tingnita ais yayamwa balan bitik kidi ulwi niningna kanin kaang ki. Traninabil kidika dakanin ki dawak laihwi talnin ki, kaput bik trai talwi baangni yamninna ki. Gabamint tingnita yamwa kidi, pa muihni ilpnina yulni tingta yamnin karang ki.

Gabamint kidika La yulwa yaka munah, mint lauwi dianin karang ki, gabamint tingnita muihni balna yakaluwi, tingnita yamwa pasyakat, di dau kalna kat, awaskat yamnin bik yamwas dawak di daukalna kat, yaka munah pa muihni dinina, ramhnina awaskat, yamnini as dau kalpamna kat, kidi pasyak kawas ki, sau daukalwi kaiwa kaupak di dau kalna balna kidika. Gabamint yaklauwi tingnita muihni kakahni yamna yak di laihna karang ki. Gabamint warkni kalahyang satnibalna kidi salahni yak sak karang ki, La Rikni kau ais yulwa balna lanibahna karang kat, gabamint dini laihwi tingnita kasuk yamwas kat, awaskat, tingta yamwa munah la bahna awaskat, trabil bikisni as yamna karang kat.

Kaput bik Gabamint muhni yak trabil duduwa karang ki, tingta yamwa munah, parasni minit bayakwi trabil yamwarang, baskiwi yamwas dawak kakahni kalahna balna kidika. Pa muihni karak tingta yamnin dini kidi, sukus turukyang tingnita kapat wirlawas akrang ki. Pa muihni dawak Apis dini tunan wauhnin tingnita kidi La yakalauwi tingnita yamna karng.

Lanibin 132. King Sauni Lani Binin Parasni kidika, King Lani Ulnin Pani yak tingta yamwarang, pa muihni balan yaklauwi kaput anidar kalana. King Lani Ulnin Pani kidi pasyak bangki La Yamyang Muih as luih arungka minitkau salap dawak usnit muihni karak, dawak walwi yayakna muih bitik but munwi, papatni, barangni, uluh lani dawi tanitdakna lani munah, muih yapak yalahwa bani yak laihwi talwi tanituna walwi yakma ki. King sauni aiska yak iliksan Lani kau yulwa munah yayakwarang ki, 20 La yamyang dawak sau pisni sahyakna satni balna, dawak Alas Lanikat yalahwa sauni bitik dawak 70 la yamyang.

Balna, parasni lani karak kalawa kat, King Sauni Aiska Tingnita yamnin mukuntak kaupak, lalah aitani kalana karang ki, King Sauni Lani Ulnin anipis yakat.

Lanibin 133. Kaput bik, La yamyang dawak sutni muihni kapat, King Sauni Aiska Lani Ulnin pas yakat bang ki, Tatuna Nuhni King dawak sutni muihni, wisam palni muih walwi yakwak win kalahwi bayakwi saran laihwa muihni balna kidi, kaput bik, La yamyang dawi surni muihni kapat wawatwa ki, walwi yaknin paskau Tatuna Nuhni King dawi sutni muihni kalnin yulni kiri bayakna dawi usnit watna muihni balna kiid bik.

Lanibin 134. 1. La Yamyang kalnin yulni kat apatnah muihni atnin ki:

a) Nikarawah walanibis atnin. King uk sauni walanibis kalna dai kat, ayangni yakaupak yakpamnin ki, baisa walwi yamwas kurih arungka tanit kaupak.

b) Pa muihni kapat dawak pulitik warkniyak bik ramhni barangni kat duwa atnin ki.

c) Kurih muihas luih as minit kau as kuihwi bayakna atnin ki.

d) Baisa walwi yaknin tingnita yamwas tanityak, King sauni pas akat, dawai kalahwas kurih arungka yalahna atnin ki, kidi pasyak kawas ki, king sauna uk kau ma gabamintki warkni yamwa muihni balna, king mahni kaluduhna anipis kau tingta yamwa muihni balna kaput bik, king sauni uk kau skul kawa muihni balna kidi. Minit yakat, sauni yakna pisni awaskat, Alas Lani kat yalahwa la yamyang kalnin walwa pani yak batanhna atnin ki awaskat, kurih bu yalahwa sak atnin ki.

2. Adika muihni balna sip La yamyang tunani dawak sutni muihni kapat kiras karang ki:

a) Gabamint minisnitru dawak sutni muihni, King Sauni Aiska Lani laihwi yamwa tanituna balna, King Sauni Aiska Walwi Yaknin Tanituna balna, Gabamint Tngnita Yamwa Yamnini Minit Talwa Muihni balna, Gabamint Lani Minit Talwa Tanituna balna, Pa Muihni Ramhnina Tanitdakwa Tanituna dawak Usnit muihni bik, King Sauni Aiska La Wihnita minit talyang balna, dawak yaihnitkau gabamint yaklauwi ana muihni balna bik, Alkaldi balna bik, sip karang kirana atninmkaunah tingnita kaupak dawi kalahnin karang ki, baisa tatuna walwi yakninyamwas tanit yak, waiku salap minit kau bu yak.

b) Suts satni bitik kau tani duyang muihni kidi, kaunah baisa iliksan yamwas tanitkau waiku salap minit kau tanitkaupak tingnita dawi kalahna laihtak sip karang.

Lanibin 135. King sauni Lani ulwa anipis La yamyang as bik sip awas karang gabamint kaupak sau ritsni yaknin anidar duna atnin, awaskat gabamint kamnipani, dakni as awaskat King sauni uk kamnipani, tanituna awaskat, tani walyang kapat kalna atnin, gabamint karak kantrak rawaswa munah. Adika lani minit bayakwi
yamwarang kat, kantrak yamna munah ais yamnini duna bitik parasni diswarang ki, dawak kampani tanituna parasni bik diswarang ki.

Lanibin 136. King Sauni Lani Uni, Lani yamyang balna kidi walwi yakna karang ki, kurih singka warka yamnin yulni, dawak tingnita kau awi parasni kalana mani kaupak kulna karang ki, walwi yaknin yaknin yamwi bayakna kaupak, kurihni uk kuskus wainiku ma tiaskau arungka kawa mani kaupak.

Lanibin 137. La yamyang daswak usnit muihni, King Sauni Lani ulnin anipis kau wark yamnin yulni but munwi yayakna kidi, Walwi yaknin Yamnin Parasni Tanituna muhni kau pramis yamna karang ki. King Sauni Aiska Lani Ulnin anipis kidi, King Sauni Aiska kau Iliksan yamnin Parasni yaklauwi pani kalana karang.

Lanibin 138. King Sauni Aiska Lani Ulnin Anipis kidi adika yamnin parasni duwa ki:

1) La balna dawak gabamint lani ulnin dawi parasni kalana atnin, kaput bik, La pat bang kidika sat uk wirlanin dawi parasni lakpamnin.

2) La kidi tannika laih palni yakwi kalanin.

3) Witin alas tuna duwa munah awaskat, Prisidinti yulwarang munah, silak muihni tranibil dawak disnin awaskat, silak kaupak yakpamanin.

4) Gabamint Minisnitru dawak usnit muihni balna kau, Gabamint Laniyar balna dawak usnit muihni balna kau, Gabamint Anipis Satni Tunan duwa muihni balna kau, diyulwak warknina yayamwa kidika niningkana atnin, dawak adika muihni balna, salahnina yak sakki, sip minit bayakwas, ramh palni niningkana atnin. Kaput di yulwak muihnina palni kalahwi La yamyang muhnina yakat nangnit lana karang ais kalyulwi dakawarang balna kidi. Muhnina yak kalahwi yulnin kidi, taihwi bik yamnin sip karang ki, La yamwa tani balna kau ais yayamwa lani kat yamna karang. Sip kulnin lani, la yamyang muihni kalahwi diyulwas karang kat, warkni kaupak yakpamnin sip karang ki.

Kakahni nuhni as duwa kapat di kulnin sip karang kat, adika kulwi yakwa yakarak, La laihnin sip awas parsani duwa kidi tingni dakwa karang ki, muihni yulwa kidi kapatnah parasni duwa karang kat.

King Sauni Aiska Lani Ulwa Anispis kidi talwak gabamint tingta yamwa mui hni ki di t i ngni t a ki di yamni n si p awas kapat kalkulwarang kat, La yamyang paskaupak siksti pursint karak, but munwi tingnita kaupak yakpamna karang ki, dawi Tatuna Nuhni King kau isningpakna karang, yakaupak ma bas bayakawa pasyakat, kulnin lani duduna yakat yamnin yulni.

5) Pa muihni kaluduhna satni Lani wauhnitaya kalanin dawak tingni daknin.

6) King Sauni Aiska warkni Lalahni ulwi ridi yamna kidika laihwi talnin, yulbauwi talnin dawak barangni yamnin, dawak wat wat tingnita yamwi kiwa yulni niningkana karang, La Rikni dawak La kau ais yulwa yakat.

7) Muih ayangni sahyakwi sihwa yakaupak, La Barangni Wihta Rikni muihni walwi yakna karang, kidika tingnita pani kidika King Sauni Tanituna Nuhni King dawi La Yamyang balna karak kalpakwi lalana karang, pa muihni balna kauduhna satni duduwa yak yulwi dakawi bayakna munah. Muih ayangni ulwi lanin mani kalaih, ma salap minitkau singka pas yak yamna karang, King Sauni Lani Ulyang balna muih walwi yaknin mani yuyulwarang mani kaupak. Tatuna nuhni King kaupak muih ayangni ulwi laws karang kat, King Sauni Aiska Lani Ulyang Anispis diputaduni balna ulwi lawarang yakarak yayamna karang. Lani wihta bani kidi walwi yakna karang, King Sauni Lani Ulyang la yamyang paskaupak siksti pursint butni karak.

Kaput bik, La Barangni Wihnita Rikni yaihnityak, sim kapatnah wihnita dawak sim kapatnah muihni balna kat walwi yakna karang, dawak sim parasni kapapat duduwa karang, wihnita tanituna balna uywas kat, witinna La yayamwa karang.

8) King Sauni Aiska kau Tatuna Walwi Yaknin dawak usnit muihni balna walwi yakna atnin, Tatuba nuhni King dawi King sauni Aiska lani yamyang balna karak, muih ayangni pa muihni aslah kalalahna kaupak yulwi dakawi dawi, muih ayangni ulwi lalana yakaupak walwi yakna karang. Muih ayangni ulwi lanin mani kidi, ma salap mintkau singka karang, King Sauni Aiska Lani ulyang anipis yaklauwi ulwi lawa yakaupak. Lani wihta balna walwi yayakna karang, la yamyang balna kaupak, muih sikti pursint butni karak.

9) King sauni Aiska Lani Yanyang balna kaupak, siksti pursint karak, walwi yakna karang, Tatuna nuhni King yaklauwi, La yamyang balna karak kalpakwi, tingta pani bani yulni muih ayang ulwi lawa yakaupa, kidika bik, pa muihni aslah kaluduhna balna kau yulwi dakawi dawi yayamna karang.

a) Bank balna dawak lalah tingta yamwa anipis uk balna mint talnin anipis tanituna dawak usnit muihni; b) La Wihta Tingnita yamwa minit talnin, dawak King yaklauwi yaihnit yak wihta uk awa kidika bik, bitik kidika La Barangni Wihnita Rikni walwi yaknin yak ais sat muihni atnin yuyulwa kapat atnin karang ki; c) Gabamint Warkni Yamwa Yamnini Minit Talwa Muihni balna; d) Muih Ramhnina Tanitdakyang tanituna dawak usnit muihni bik; e) Pa Muihni Diparasnin tingnita tanituna dawak tingta uk tunan duduwa balna bik; f)Tawan paskau, dawak asangpas kau Sau di dawan balna tingta yamnin tanituna dawi usnit muihni bik. Adika tingnita muihni balna bitik kidi kurih singka wark yamnin yulni walwi yakna karang, dawak La Laihnin awas parasni duduna karang.


Adika tingnita pani balna sahyakna numba 7), 8) kau yulwa balan kidi tatuna Nuhni King dawi la yamyang balna muih ayang papakwa muihni balna karak kalwanaih muihnki atnin awas ki, Ani muihni kat, sulani arungka kat, dawak marit munah kalwanaih kalna kat, sulani bu kat karang ki, dawak bik, pulitik daknini balna sau daklana pisni, alkaldi sauni paskau, pulitik kaluduhna daknini tanituna paskau wark yayamwa atnin awas ki, warkni yayamwa kat, tingnita kidi dawi kalahna atnin ki.

Tingta pani kalanin ayangni ulwi lanin mani kidika ma salap minitkau singka duwa karang ki King Sauni Aiska Lani Ulwa Anipis yaklauwi, walwi yaknin tada isningpakna mani kaupak. Prisdinti yakalauwi muih ayangni lawas karang kat, la yamyang balna muih ayangni duduwa yakarang amungni karang ki.

King Sauni Lani Aiska Lani Ulwa Anipis, kapatnah warkni kuminiti duduwa yakarak, ayangni papakna mihni balna kau, uduhwi duwi di yulwi dakana karang ki. Ayangni papakna muihni balna kidi tingta yamnin aitani sip muihni atnin ki, dawak ayangni lana yaihnit yakat, skul duna wauhnitaya amungni kat duwa atnin ki, ais wauhnitaya yuyulna yakat.

10) King Sauni Aiska Lani Ulwa anipis Diputaduni balna kapahmi nuhni duduwa karang kat, laihwi talnin, laihwi dunin dawak kulnin lani barangni dunin. Kapahni nuhni duwa kapat kulna karang, dawak bik la yamyang tingta parasni duwa kidi bik disna karang, apatnah dini kalahna karang kat:

i. Tingnita kaupak dawi kalahnin ulwi lawarang kat.
ii. Dauwarang kat.
iii. La bahna nuhni as yulni, silak kau bukna kat, awaskat kakahni nuhni as yulni ma naini silak kau anin patni duwa kat, dawak tingnita duwa mani kidi praisni awaskat, baisa ma mahni praisni sinilak kau bukna kat.
iv. La yamwa mani as ahana pasyakaupak, adar dis bik, ma muihas luh bas praisni tingnita dapamna kat, kidi bik King sauni Aiska lani ulyang tanituna balna kau isningpakwas yamna karang kat.
v. Adika Lani rikni kau, lanibin 130, pisni sahyakna bas kau ulna niningkauh la bahna karang kat
vi. Gabamint tingtai pani uk kaupak tingnita uk as duwi yamwi, minit yulni lalahni laihna karang kat, kidi pasyak kawas ki, sumalnin tingnita awaskat, sika tingnita kapatnah balna. Diputado as King sauni parasni anipis uk kau wark pani as duwarang kat, King Sauni Aiska Lani Ulnin tingnita pasyakat watwi kanin sip karang ki, tingnita uk laihna kidi saran laihna dana karang kat.
vii. Tingnita laihna mani, Gabamint warkni yamnini minit talyang muhni kau, ais yamnini duwa balna yulwi yaknin salahni yak duwa bik, yulwi yakwas dana karang kat.

11) Gabamint tingnita muihni, tingnita dawi kalahnin dawak Lanibin akat, sahyakna numba 7), 8) dawi 9), kau yulwa kakahni yulni warkni kaupak yakpamnin lani balna kidi laihwi talnin, dawak bik, laihwi duna atnin, ampat la kau yulna yakat;

12) King Sauni Mahni Ramhnina yulni, King Sauni Mahni kalpakwi la yayamna balna kidi laihwi duna atnin awaskat dapamna atnin. King sauni mahni Ramhnina yulni la uhulna balna kidi, minit tang manah, laihwi talnin, yulbauwi talnin, laihwi dunin awaskat dapamnin manah sip karang, kaunah lani wauhnitaya sat uk kau wirlanin laih sip awas karang. King sauni lani yamwa paskau dunin kidika, sip ki, Nikarawah paskau, dawak ahni kau bik, la lainni yak di usna atnin, King sauni uk balna paskau lani parasni laihna mani, biri biri ayangnina rawawaswa munah, awasakt tingnita yamnin mani ahana kat yayamwas karang kat.

13) King sauni aiska kau parasni kalawa wayani balna laihwi barangni yamna atnin;

14) King sauni aiska pas akat, muih kau kalkulna lani kalanin ini balna yamna atnin;

15) King sauni akaunah kalkulna lani kalanin balna anidar lawi kalana atnin;

16) Rispik nuhni lakni karak klauduhwi Prisidinti dawi usnit muihni yak laihwi duna atnin, kurih as tingnita yamna kidika ulwi niningkawa kidi dakana atnin yulni;

17) Tanituna balna walwi yaknin;

18) Nining wark yamnin Kuminiti, tingta aslah dini dawak di tanka walwi talnin kuminiti balna binin;

19) King sauni akat dawak muih bitik sangnika kau tingta yamni yamna muihni kau prisantni kapat minit as lauwi kalanin;

20) King sauni adi gabamint tingnita yamnin pisni kau ampat sahwi sahwi yaknin kidi barangni yamnin;

21) King sauni aiska pas akat king tingnita yamwa pasyak kanin walwa kidi, muikuntak dawak pa muihni sngnika baraknin yulni tingnita balna ridi yamna atnin;

22) Tatuna Nuhni King dawak usnit muihni, pani albupak, sim mani yak, muih dis dadawarang kat, pani yak muihni awi barangni yamnin;

23) Tatuna Nuhni King kidi ma sauki kaupak, ma salap minitkau singka kalahwi kiunin karang kat, anidar kalanin, dawak usnit muihni kidika bik, Ma sauki paskau tatuna nuhni Kingi kidi dis awa mani;

24) Gabamint La wihnita balna awaskat, pa daniwan balna kaupak, barangni, gabamint tingnita muihni La laihnin awas parasni duduwaa balna, laihwi talwi dawi barangni yamnin yulni;

25) Witinna paskau lanina dawak ampat tingnita yamnin lani kidi, awi dunin awaskat sat uk wirlanin;

26) Gabamint sukuni turukyang balna, King sauni pas akaupak, King uk sauni kau alahwi uynin kat, anidar kalanin awaskat kalawas atnin;

27) Di tunan minit launin tani yamnin, lani anin awaskat, sat uk wirlanin, dawak alkaldi balna di tunan mint daknin tani ridi yamnin;

28) Gabamint Tiingbnta wauhwa kaupak, La Rikni kau Muih Ramhnina dawi Sangnika Tanitdakwa lani balna parasni laihwatnin Lani ulwi yakwa kidi, dawak King Sauni kakahni duwa Lani ulwi yakwa kidi, parasni kalanin, dapamnin awaskat sat uk wirlana atnin, kaput bik, mani baisa naini dawa tannika bik;

29) Gabamint Tingnita Yamnini balna Minit Talwa Tanituna, awaskat, kuminiti kaupak wais kau pakna karang kat bik; Pa Muihni Ramhnina Tanitdaknin Tanituna; La Wihta warkni Minit Talyang tanituna; Bank balna Minit Talayang tanituna dawi lalah tingnita yamyang aninpis uk balna, dawi Gabamint Bankni Rikni Prisidinniti kaupak, ais tingnita yayamna yulni, kurih bani ulwi lalawa kidi laihwi duna atnin, taingnita yulni satni uk balna nitni kalahwa minit yakat;

30) Tatuna Nuhni King yakalauwi warkni muihni pakna balna kidi, Minisnitru dawi usnit muihni, Gabamint Tingnita Laniyar tanituna dawi usnit muihni, King uk sauni kau gabamint tingta yamnin sihwa muihni balna, dawak gabamint anipis uk balna tingnita tunan muihni awa balna kidi, parasni kalana atnin, tingta mani salap
mintkau singka pas yakat, La yamyang siksti pursint bunitu karak. Tingta muihni pakna balna kidi parasni duduwarang ki, King sauni Aiska Lani yamyang balna yakaluwi parasni kalana mani kat. Parasni kidi kalawas karang kat, Tatuna Nuhni King yaklauwi muih uk kau pakna karang, wark mani muihas luih minitkau salap pasyakat, dawak adika muihni balna bik, ampat parasni dianin tani yayamna yaka munah bayakna karang.

31) Tingnita mani ridi yayamna kat, dawak wark wisamni bik kaluduhwi yamna atnin;

32) Parasni uk balna La Rikni dawi La balna yaklauwi diawa balna bitik.

Lanibin 139.La yamyang balna kidi, King Sauni Aiska lani yamwa pasyakat, ais kulnin lani yulwi yakwa dawak but mumunwa balna yulni salahni yak kakahni dis karang, dawak la yulwa yakat, La laihnin awas parasni duduwa ki.

Lanibin 140. Adi muihni balna La wisamni as yamnin Ta bahnin parasni duduwa ki:

1) King Sauni Aiska Lani Ulyang balna, minit yakat sip ki, gabamint lani, la yamyang balna kulninna lani dawak yulwi yakwa balna bik tani bahna atnin.

2) Tatuna Nuhni King.

3) King sauni Lani Wihta Rikni, King Sauni AiskaTunan Muihni walwi yaknin, Alas Lani Gabamintni Tanituna, Alkaldi Sauni tanituna balna, ais tingnita yamnin parasni duwa pas yakat.

4) Nikarawah gabamintni yaklauwi Sau wisamni yalahwa pani Papus kingni sauni balna muhnina kau La yamyang sihwa balna kidi. Apatnah pas yak laih, Sauni pisni akat aslah kalpaknin lani dawak gabamint lani balna manah yak ta bahnin parasni duwa ki.

5) Pa dawan balna. Apatnah yak, muih tausin singka minitkau ayangnina rawaswi parasna atnin ki. Adika pas akat kawas ki, Gabamint Anipis Nunuhnio balna lanina, di tunan minit launin lani, awaskat, King sauni uk karak wark yamnin lani, dawak silak muihni tranibil dawak disnin dawi silak kaupak yakpamnin lani balna kapat.

Lanibin 141. King sauni Lani yamnin kaluduhwa kidi, parasni duwa karang ki, La yamyang bitik kaupak papusdak minit kau as kaluduhna karang kat.

La balna, Gabamint tingnita lani, kulnin lani, kulnin aslah kalahna, dawak yul yakwa balna ridi yamwa lani balna yak laih, barangni yamnin yulni kat, la yamyang bang yakaupak, mahnini palni yakauh bunitu nitni karang ki, kaunah sip karang ki sat uk atnin, La Rikni yaklauwi sat mahnini satni uk yulwarang laihtak.

La wisamni as ta bahnin kidika, ulwi lana karang, King Sauni Aiska La ni Yamwa Ulyang balna yakat, yaihnityak awarang ki, ais yulni lani wisamni walwa tannika balna.

La wisamni as Ta bahwa bani ulwi tingnina kau awa kidi, La yamyang bitik muhnina kau yulwi talwi bayakna usnit kat, barangni kuminiti tingni yak lana karang.

Tatuna nuhi King yaklauwi di sirihni as yulni, La wisamni Ta bahwa kat, tunan duwa daknini balna yaklauwi barangni la yamyang balan bitik pasyakat, lana karang ki, laihwi yulbauwi talnin yulni, dawak lani ridi yamna kidi, awar muihas luih bu minitkau tiaskau bas tanitkau, La yamyang tingnina yak ana karang kat.

La Rikni Usnit kau balna dawak la nanaini warkni ridi yayamwa balna kidi, La yamyamng kaluduhna bang kidi kulnin lani kat, La tuna sahyakna bani laihwi talwi barangni ahawa karang.

Tunan laihwi talwi kulnin lani uknin kuminiti ulwi lana kidi laihwi duwi, la yamyang bitik muhnina yakyulwi talna karang, yakaupak yulni tuna balna manah alihwi tatalwarang; barangni ahawarang kat, yayahni bikikis kaupak laihwi tatalna karang.

La wisamni yamnin ridi yamna kidi, King sauni Aiska lani yamyang balna yaklauwi barangni yamwi bayakna kat, Tatuna nuhni King kau sihna karang ki, lani parasni kalawi, ulwi yakwi dawi muih bitik muhnina kau niningkanin yulni, kaunah apatnah tani munah bayaknin nintni awaskat laih kapat yayamwas karang. Gabamint Tunan Wauhwa parasni kaupak, parasni kalanin nitni dis karang ki, La Rikni, dawak La Rikni Lani balna, sat uk wirlawa balna kidi, dawak King sauni Aiska lani yamyang balna yaklauwi gabamint lani ulwi yayakwa balna kapat. Tatuna nuhni King kidi La Rikni dawi la rikni lani balan sat uk wirlanin ridi yamna balna kidi ulwi yakwi muihyak niningkanin yamwas karang kat, awaskat lani uk balna kidi ma salap mintkau singka pas yakat parasni kalawas, ulwi yakwas dawi muihyak niningkawas karang kat, King sauna Lani Ulwa Anipis tanituna palni yaklauwi sihna karang ki, muihyak ulwi yakwi niningkana karang, di kalahwak ulwi yakwa kamnipani tani munah dawak yaka mani kaupak Lani kidi Parasni duna karang, Gabamnit Tingnita Mabani Ulwi Yakwa wauhnitaya kau ma uk kau ulwi yakna karang bik, kaput bik mampat mani, di kalahwa balna ulwi yakwa tani munah, niningkana mani kidi, ulwi dana karang ki.

La balna kidi ampat laihwi tingta yamnin tani balna ulnin karang ki, la ni yak kapat yulna karang kat. King Sauni Lani Ulwa anipis yaklauwi, La balna ampat laihwi tingtai yamnin lani ulnin kiidka, kuminiti tingni yak dana karang, la yamyang kaluduhna yulbabauwa yaklauwi barangni anin yulni, Tatuna nuhni King yaklauwi mani kalana pasyakat barangni yamwas dana karang kat.

La balna kidi Parasni lakwa ki, awaskat sat uk wirlawa ki, La uk yamna munah, dawak parasni laihna karang ki, Gabamint tingta Mabani Ulwi yakwa munah ulwi yakwa yakarak, kaunah lani munah, tani uk pakna karang laihtak taniuk munah parasni duna karang.

King Sauni Aiska Lani Ulwa anipis yaklauwi La balna tuhnini kaupak sat uk wirlawa balna mani, adar lanin sip karang, wauhnitaya aiska, sat uk wirlana dini balna bik pas yak awi, Gabamint Tingnita Mabani Ulwi yakwa yak ulwi yakna atnin, La Wihta lani rikni balna laih kapat yamwas karang.

La wisamni tunan bahna as, la yamwa kurihni as pasyakat ridi yamwi niningkana, dawak yulbauwi barangni yayamwas dana kat, la yamwa kuirhni uk yak laihwi tatalna karang. Laihwas dapapamna lani balna kidi, sim La yamwa kurihni payakat laihwi talnin sip awas karang ki.

Lanibin 142. Tatuna nuhni King kidi sip karang ki, la ridi yamna as, tingni kau basia kawas kat, ma salap minitkau singka pasyak, laih watna atnin, lani aiska awaskat pisni as yak. Adika parasni duwa yakat yamwas karang kat, lani parasni kalawas, ulwi yakwas dawi yakwi niningkawas karang kat, King Sauni Aiska Lani yamwa anipis Tanituna yaklauwi lani kidi sihwak ulwi yayakna karang, ma sauki kau di kalahwa balna ulwi yakwa tani munah.

Tatuna nuhni King yalauwi La pisni as kau laihwatna karang kat, lanibin pisni yakat, sat uk wirlana pisni anin sip karang ki.

Lanibin 143. La ridi yamna as, Tatuna nuhni King yaklauwi lani aiska awaskat pisni as kau laihwatna kidika nawatwi King sauni aiska Lani Uhulwa paniyak suhna karang ki, ais yulni laihwatna tannika ulwi niningkawa karak.

King Sauni Aiska Lani ulwa Anipis kidi sip karang, La aiska laihwatna kidika, laihwas dana atnin, La yamyang bitik paskaupak papusdak Apis bayakwa butni karak, kaput kalna karang kat, King Sauni Aiska Lani Ulwa anipis yaklauwi Lani kidi sihwah ulwi yayakna karang.

La as laih watna kidi, pisni as yak manah kat, lanibin laih watna pisni bani yak, ais yulni laihwatwa tannikka yulwa atnin ki. Adika laihwi talnin kuminiti kidi laihwi talwi lani ukna karang ki, lanibin laihwatna bani yak. King Sauni Aiska Lnai Ulwa anipis kidi, La yamyang bitik paskaupak papusdak minitkau apis bunitu karak, sip karang laihwatna lanibin bani kidi laihwas dana atnin, kaput karang kat, King Sauni Aiska lani Ulwa anipis yakalauwi sihwak lani kidi ulwi yakna karang.

Lanibin 144. Gabamint Tingnita Tuna Parsni kidi, tatuna nuhni King yaklauwi tunan duwa ki, witin kuduh King Sauni Aiska Parasni Tanituna ki, Gabamint t anit una dawak Ni karawah Gabamintni sukuni Turukyang Tanituna Nuhni Palni.

Lanibin 145. Tatuna Nuhni King usnit muihni kidi, tingta yamwa karang, adika Lani Rikni kau ais yamnin ulna balnan yakat, awaskat, King yaklauwi barangni ais pakwarang yakat, awakat la munah pakna karang. Kaput bik, king pani yak laihna karang, ma parahni as awaskat, barangni tingnita dawi kalahwa kat.

Lanibin 146. Tatuna nuhni King dawak usnit muihni kidi walwi yakwa munah walwi yakwa ki, muih bitik munah, papatni, barangni, uluh lani dawak tanitdakna lani balna munah. Walwi yakna karang, baisa but mahni yakna muihni kiidka.

Lanibin 147. Tatuna nuhni King dawi usnit walwi yaknin kat, but mumunna yamni yakaupak pati pursint yakna atnin ki, kaunah sip karang pani kidi laihnin, angdika muihni tarhti paip pursint laihna karang bik, usnitkau kira daknini muihni kidi mintyak paip pursint manah bin karak mintikau but yakna karang kat. Walwi yaknin kau kira muihni as bik, walwi yaknin pursintni yulwa kidi uywi kuihwas dadana kat, watwi walwi yaknin uk as yayamwarang, dakni tatuna dawak usnitkau kau but baisa mahni yakna daknini balna manah, dawak win kalahna karang, angdika baisa but mahni yakwarang kidika.

Tatuna nuhni King, awaskat usnit kidi kalnin yulni kira kidi, walwi yakwa yamwa mani pasyakat, tingnita danin ulwi lawarang kat, barangni dawarang kat, awaskat, di sip awas kalahwarang kat, angkaupak kira pulitik daknini yakaluwi pakwarang, wais balna pani yak kawarang muihni balna kidi.

Tatuna nuhni King awaskat usnit kau kidi kalnin kat apatnah muihni atnin ki:

1) Nikarawah sauni walanibis atnin ki. La munah King uk sauna walanibis kalna kat, yakaupak ulwi lawi kalahnin ki, baisa iliksan yamwas kurih arungka tanit kaupak.

2) Pa muihni kapat dawak King tingnita pas kau laihni walwa tani yak bik kakahni dis atnin ki.

3) Kuirih muihas luih minitkau singka laihna muihni atnin ki.

4) King sauni pas akat, dawi kalahwas, kurih arungka yalahna atnin ki, walwi yaknin yamwas tanityak, kiidka pasyak kawas ki, gabamint yakaluwi King sauni uk kau sihwak tingta yamwa balna, King sauni mahni kaluduhna tingnita yamwa dai kat, awaskat King uk sauni kau skul kawa lik dai kat.


Tatuna Nuhni King dawak usnit bik kalnin sip awas karang ki:

a) Tatuna nuhni King kalnin yulni walwi yakwa yamwa mani balna pasyak, Tatuna nuhni King kidika, awaskat, King sauni tunan duwi tingta yamwi bayakna muihni kidika, kaput bik, Tatuna nuhni King wat bu kawi bayakna muihni balna kidi;

b) Tanityak tatuna nuhni King yaknin yulni walwi yaknin yamwa tanityak waiku salap minitkau bu pasyakat, King usnit kidi, awaskat la munah tingnita pani yak ana muihni kidi, awaskat Kimg pani yak kawi tingta yamna muihni kidi;

c) Tanityak King kalnin yulni walwi yakni yamwa mani balna pasyak, King, awaskat kidi tingnita duwi bayakna muihni wanaihni balna kidika, buhni kat, dawak suluni kalwanaih kalna laih sulanibu kat, wanaihni balna kidika sip awas karang King kalnin;

d) Gabamint as parasni kaupak bauwi yakwa muihni kidi, awaskat lalah kau diparasna muihni kidi, La Rikni munah gabamint wauhwa sak kidi, laihwi bahwi Gabamint tuna duna muihni, Mininstru awaskat sutni muihni, awaskat, King sauni parasni as kau kawi tingta tunan kana muihni kidi;

e) Suts satni kau tani duyang muihni kidi, kaunah sip karang kana atnin, basia walwi yaknin yamwas tanityak waiku salap minit kau bu praisni warkni kaupak dawi kalahna kat;

f) King Sauni Lani Ulwa Tanituna, Mininstru dawak usnit muihni, La Wihta Rikni tanituna balna, dawak Walwi Yaknin Tingnita Parasni Tanitunan balna, Gabamint Tingnita Yamwa Yamnini Minit Talwa Muihni balna, La Wihta Tingnita yamwa minit talnin, dawak King yaklauwi yaihnit yak wihta uk awa kidika bik, bitik kidika, Gabamint tingnita Laniyar dawak usnit muihni kidi, Muih Ramhnina Tanitdakyang tanituna dawak usnit muihni bik, dawak alkaldi warkni duwa muihni balna kidika, kaunah sip karang ki, baisa iliksan yamwas tanityak warkni kaupak dawi kalahwarang kat.

g) (tappamna)

Lanibin 148. Tatuna nuhni King dawak usnit muihni walwi yaknin yamwi yayakna kidi tingnita pani duna karang, King Sauni Lani Ulyang muhnina yak, rispik lani kaluduhna nuhni kau La pranimis yamna karang, King sauni Lani Ulwa tanituna muhni yak.

King dawak usnit kidi, kurih singka tingnitai duwi yamna karang. Mani kidi kulna karang, warkni pani duna mani kaupak, walwi yakna yamwi bayakna kurihni usnit kau kuskus wainiku ma salap kaupak. Adika mani balna pasyakat La laihnin awas parasni duwa karang ki, la kau ais yulwa yakat.

Lanibin 149. Tatuna Nuhni King adika tingnita yamwi, sip karang ki, adar dis, ma salap mintkau singka praisni King sauni uk kalahna atnin. Ma salap mintkau singka mintkau dawak, ma muihas luih minitkau salap praisni kat kalahnin karang laih, King Sauni Lani Ulwa anipis kaupak anidar yakna atnin ki. Apatnah kalahwa mani yak King sauni Prisidinniti usnit muihni kidika tingni yak sakkarang ki Gabamint tingnita tunan dunin kidika.

Kaput bik, Tatuna nuhni King kidi King sauni uk kau kalahwi kiunin sip karang ki, waiku bas praisni, King Sauni Lani Ulwa Anipis anidar karak, dawak gabamint tingnita tunan dunin kidi king usnit muihni tingni yak dana atnin ki; kaunah dawai kalahna kidi waiku bas minitkau bayakwa kat, ais yulni karang bik, mani bayakna kidika yulni manah, tingta pani kidi disna karang, kaunah sip karang, King Sauni lani Ulwa anipis yaklauwi kulwi talna atnin, sip minit bayaknin awas tranibil kaupak kalahwa kat, dawak sip karang baisa mani apis minit pakwi naini kalana atnin.

Tatuna nuhni King kidi, anidar yaknin nitni duwa bik, King Sauni Lani Ulwa Anipis kaupak anidar dis kalahwi kiwarang kat, awaskat, anidar kalana minitkau diswarang kat, tingnita kaupak dapamna kapat kalkulna karang.
Tatuna nuhni King kidi ma parahni as dis mani yak, King usnit muihni kidi kalahnin sip awas karang ki, King Sauni Lani Ulwa anipis kaupak adar dis karangkat. Anidar dis ban kalahwi kiwarang kat, tingta dapamna kapat kalkulna karang.

King usnit muihni kidi, King sauni uk kau lik mani, dawak king bik tingta yulni King sauni uk kau kalahwi kiunin karang kat, gabamint warkni tunan duwi yamnin balna kidi, yaihnit palni kau ministru duwa muihni tingni yak dana karang ki, la munah usnit yak ampat parasni duwi aiwa munah.

Tatuna nuhni King, La bahna kakahni nuhni as duwa kat, baisa lani yayamwas kat, apis bik King sauni uk kau kalahnin sip awas karang ki.

Tatuna nuhni King kakahni bikikisni kapat kulna ki:

1) Ma parahni as ma sauki kaupak dawi kalahnin, ma salap minitkau singka minitkau.

2) Ma parahni as, laih palni tingnita yamnin sip awas kalahnan kat, dawak King Sauni Lani ulwa anipis yaklauwi yulwi yaknakarang, dawak la yamyang balna paskaupak papusdak minitkau butnina karak.

Adika lanibin kau ulwi dana minit yakat, King dawi usnit muihni pasyakat kakahni barangni nuhni kalkulna ki:

a) dauna karang kat;
b) tingnita danin ulwi lawarang kat, King Sauni Lani Ulwa Anipis yaklauwi laihwi duna karang kat;
c) barangni sakahwa kalna karang kat, King Sauni Lani Ulwa Anipi s yaklauwi yulwi yakwarang kat , dawak la yamyang paskaupak papusdak minitkau bunitu kalana karang kat.

Ma parahni as tatuna nuhni King kidi dis karang kat usnit muihni kidi gabamint tingnita kidi laihwi duna karang.

King dawi usnit muihni kidi, sim mani yak, wark as bik yamnin sip awas kalalahwarang kat, Gabamint tunan dunin tingta kidi, pas munah, King Sauni Lani Ulwa anipis Prisidinniti kidi tunan duna karang ki. Gabamint pas munah, King tingnita tunan duwi kiwa mani yak, witin tingnita palni kidika, King sauni Lani Ulwa Anipis tanituna usnit muihni tuna kidi tingnita kidi laihwi yamwa karang ki.

King kidi barang diswarang kat, baisa tanitkau duwi liunin mani balna yak, king usnit muihni kidika tunan duna karang, dawak King sauni Lani Ulwa anipis yaklauwi tatuna usnit uk as walwi yakna karang.

King usnit kidi barang tingnita kaupak diswaranag kat, King Lani Uni yaklauwi as pakna karang ki, paniyak kawarang muihni kidi.

Tatuna nuhni King dawi usnit kidi tingta kaupak barang didiswarang kat, tuna paniyakat, King Lani Uni tanituna, awaskat, tingnita duwa muihni kidi kana karang ki. King Lani Uni yaklauwi, pani kau muih dis kalna kaupak, awar muihas luih bas minitkau bu laihwarang pasyakat pakna karang ki, wais paniyak kanin muihni kidi. Pani yak pakna muihni balna kidi warkni yayamwarang, tanitkau baisa
ma ampus duwa pasyakat.

Kakahni kalahna pakwa bitik pasyakat, King Lani Uni yaklauwi, witinna pas kaupak, walwi yakwi dadana pani yak ahana karang ki.

Lanibin 150. Tatuna nuhni King tingnita balna ki, ma takitkau pakwa balna kidi:

1) La Rikni dawak La uk balna ais yulwa yakat yamnin karang ki, dawak witin dinit kau tingnita muihni balna yak bik diyamwak ais la yulwa yayamna karang.

2) King Sauni daklana kidi tunan kanin.

3) La wisamni ta bahnin dawak La Laihwatnin Parasni duwa kidi warkni laihwi yamnin, ampat adika La Rikni kau lakwi dana yakat.

4) Apis tingnita tunan dunin yak, gabamint Lani ridi yamwi ana atani.

5) King sauni Aiska Warkni mukuntak ridi yamna atnin dawak, King Lani Uni kau niningkana atnin, yakaupak laihwi barangni yamnin, lani parasni kalanin dawi ulwi yakna atnin, barangni yayamna usnit yakat.

6) Gabamint Parasni Minisnitru dawi usnit muihni balna kau, Gabamint tingnita minit talyang balna dawak usnit muihni bik, Gabamint anipis satni tanituna balna, King sauni kau gabamint ayangni kau tingta yamnin tanituna balna, tingnita pani dianin dawak yakpamnin bik, dawak King Sauni lani Ulwa Anipis kau niningkanin karang ki, ma bas pasyakat, tingnita pani kidi barangni parasni kalanin yulni, dawak tingnita pani barangni laihna karang, King Sauni Lani ulwa Anipis yaklauwi parasni kalana munah.

Gabamint tingnita kaupak yakpamna atnin, King sauni Lani Ulwa Anipis yaklauwi parasni duwa yaka munah, kaput kulnin lani duwarang kat.

7) King Sauni Lani Ulwa Anipis bakisan kau sak awa mani balna yak, tatuna palni yak yulwa karang ki, trabil nuhni as kalahna yulni, lani yamyang balna kidi uduhwi duwi yulbauwi la yamna atnin.

8) King sauni adika King sauni uk balna karak ampat kalpakwi wark yamnin kidika tunan dunin karang ki. Adika Lani Rikni, lanibin 138, pisni 12) kau yulwa yakat, King sauni uk balna karak kalpalwi la yamwi, kulnin aslah kalahwi ayangni rawaswasna karang, adika bik, King Sauni Lani Ulwa Anipis yaklauwi barangni yamna karang ki.

9) Adika Lani Rikni kau ulwi dana yakat, Muih Ramhnina dawak sangninaka tanitdaknin lani duwa bitik kidi parasni lakpamnin Lani kidi Ulwi yakwi tingta yamna atnin, dawak lani ulwi yakna kidi, King Lani Uni kau sihna karang, awar muihas luih bas minitkau salap minitkau bu pasyakat, barangni yamnin, sat uk wirlanin awaskat dapamnin yulni.

10) Nitni duwa lani balna kidi, ampat tingnita yamnin lani ulwi anin karang, Lani nuhni uhulna kaupak ma muihas luih bas bayakwas pasyakat.

11) King sauni pas akat, rispik nuhni dawak parasni kalanin anidar diana atnin.

12) Gabamint tingnita ridi yamwi tunan duna atnin.

13) King sauni mukuntak tingnita kidi tunan duna atnin, pa muihni sangnika ampat baraknin tani ridi yamwi tanityak duwi kiuna karang.

Pa Muihni Sangnika Baraknin Tingnita ridi Yamnin Daknini as binin karang, yakarak kalparaswi King Tingnita pasayak kanin, mukuntak tingnita dawi pa muihni sangnika baraknin tingnita tunan duna atnin. Daknini pasyakat bang karang ki, kampani kaluduhna, tingta muihni kaluduhna, Di dahyang kaluduhna, pa binina kaluduhna tanituna balna, dawaj uk uk bik, King yaklauwi wais balna pakwarang bitik.

14) King Lani Uni yak pakwi lawi kaLana karang, gabamint warkni nuhni tunan anin muihni ayangni balna, La Wihta Rikni tanituna balna, walwi yaknin tingnita Parasni Tanitunan balna, Gabamint Yingnita Yamwa Yamnini Minit Talwa tanituna balna, Bank bitik minittalyang Tanituna dawak usnit muihni kidi dawi Mukuntak Tingnita yamwa anipis uk balna tanituna, La Wihta Tingnita yamwa minit talnin, dawak King yaklauwi yaihnit yak wihta uk awa kidika balna bitik.

15) King Lani Uni kau, witin muihni palni kiwi, awaskat usnit muihni kidi sihwak, kurih bani ais wark yamwa kidi, wark uk yamna yulni dawi yul wisasamni bik kiwi yulwi niningkana karang.

16) La Laihwi Yamwa Wihta Parasni balna kau, ais nitnita duduwa kidi bitik diana karang, warknina yayamwa bitik kidi laihwatwas sirihni yayamwa atnin yulni.

17) Adika Lani Rikni dawi la uk balna pasakau, tingta yamnin parasni diawa balna bitik.

Lanibin 151. Gabamint Minisnitru balna, gabamint anipis uk balna, dawi gabamint lalahni tingta yamnin anipis, yapak anin, ampat warkni yamnin ridi kalahnin dawi ais parasni duduwa akrang bitik kidi la munah yamna karang ki. Ministru dawak usnit muihni kidi la laihnin awas parasni duduwa karang ki.

King yaklauwi gabamint lani dawi adar lawa balna kidi, wais kau sihwa Mininsnitru kidi ayangni rawasna karang ki, kaunah rawasnin nit awas karang, Ministru awa, awaskat yakpamnin anidar lalawa balna kid.
Ministru bitik kaluduhna daknini kidi, King yaklauwi tuna duna karang, witin dis karang kat, usnit muihni kidi tunan duna karang. Ministru bitik kaluduhna daknini pasyak bang karang ki, King usnit muihni kidi dawak gabamint parasni Minisnitru balna bitik. ais tingnita yamninna kalaih, La Rikni yakaluwi ukwi dana karang. Gabamint Parasni Minisnitru dawak usnit muihni balna dawi gabamint anipis uk balna tanitua balna kidi, muihnina palni salahni yak sak karang ki, ais anidar wauhnitaya rawasna karang kat, kaput bik, King karak, awaskat Gabamint Parasni Minisnitru uk balna karak ais yulbauwi talwi rawasna balna bik, salahnina yak duwa
karang ki.

Gabamint Parasni Minisnitru dawak usnit muihni balna dawi gabamint anipis uk balna tanitua, awaskat tanituna balna kidi, King Sauni Lani Ulwa Anipis yaklauwi, ais warknina yayamwa yulni diyulwi dakawarang kat, tingnita palni yulni diyulna karang ki, wauhtaya ulna kau awaskat, yul kau diyulna karang ki. Dawak bik King Sauni Lani Ulwa Anispis yaklauwi la wauhnitaya bin as ulwi lawi yulwi dakanin sip karang ki.

Lanibin 152. Ministru, usnit muihni, Gabamint anipis uk balna tunan muihni, King sauni uk kau sihwah gabamin ayangni kauwark yamnin tatuna, Gabamint sukuni turukyang dawi tingparah tanituna nuhni balna tingnita pani balna kidi laihni kat, muihni balna kidi apatnah satni atnin ki:

1) Nikarawah sauni walanibis atnin ki. La munah King uk sauna walanibis kalna kat, yakaupak ulwi lawi kalahnin ki, baisa iliksan warkni pani yak awas tanit kaupak, kurih arungka praisni.

2) Pa muihni kapat dawak King tingnita kanin walwatani yak bik kakahni dis atnin ki.

3) Kuirih muihas luih minitkau singka laihna muihni atnin ki.

4) King sauni pas akat, dawi kalahwas, kurih arungka yalahna atnin ki, tingnita kau baisa kalawas tanityak, kidika pasyak kawas ki, gabamint yakaluwi King sauni uk kau sihwak tingta yamwa balna, King sauni mahni kaluduhna tingnita yamwa dai kat, awaskat King uk sauni kau skul kawa lik dai kat.

Usnit kau muihni, Gabamint anipis uk balna Tanituna palni, awasakat tanituna dawak gabamin sushwak King sauni uk akua Gabamint ayangni kau tingta yamwa tingnita pani kidi sip laihwas karang ki, adika sat muihni balna kidi:

a) Suku Turukyang muihni kat, ban tingnita yamwa muihni kidi.

b) Sim mani balna yak, Gabamint Parasni anispis uk kau wark satni as duwi tingta yamwa muihni kidi.

c) (tappamna ki)

d) Gabamint lalahni, awaskat alkaldi lalahni uduhwi duwi awaskat uduhwi duwi tingta tunan duwa dai kat, baisa tingta yamwa kidi bitik saran laihwas muihni balna kidi.

e) Gabamint lalahni wauhwa rikni kau, lalah yus munna balna baisa taras duwa muihni balna

f) Adika Lani Rikni, lanibin 130 pisni tiaskau as kau yulwa paskau bukwa muihni balna kidi.

Lanibin 153. Ministru balna, Usnitkau muihni balna, Gabamint anipis Tanituna palni awaskat tuna duwa muhni balna salahnina kau sakki, ampat tingnita yayamwarang kat, La Rikni kau ais yulwa parasni yakat.

Lanibin 154. King Sauni Aiska Tingnita Yamwa Yamnini Minit Talwa anipis kidika kuduh, Gabamint Tingbita Tunan wauhwa kidi minit talwi tingnita yamni yaman atnin, dawi gabamint yamnini dawi ristni dini balna kidi minit talna atnin tingnita duwa ki. Kidika tingnita tunan dunin yulni Apahwa ki, King sauni Aiska Tingnita Yamwa Yamnini MInit Talnin Anipis tanituna balna, yaka pasykat bang karang ki, tanituna muihni singka dawak, snitkau muihni balna bas, dawak King Sauni Lani Ulwa Anipis yaklauwi walwi yakna karang, kuirh singka wark yamnin yulni, kidika pasyakat La Laihnin awas parasni duwa karang ki. Usnit kau muihnni balna kalaih, tanituna muihni balna, ma parahni as dis mani yak, pani yak kawi warkni yamnin yulni manah papakna ki, dawak muihni kalaih, pakna karang ki, tanituna dis karang muihni yaklauwi pakna karang ki.

Lanibin 155. King Sauni Aiska Tingnita Yamwa Yamnini Minit Talwa anipis tingni yak sak karang ki adika tingnita yamnin balna:

1) Gabamint anipis kasuk yus munnin yulni, tanit kaupak, ampat tingnita yamnin yamnin tani balna ridi yamnin.

2) King Sauni Aiska Tingnita Yamnin Lalahni warkni laihwi yamwi kaina balna bitik yak usnit uywi mint talna atnin.

3) Gabamint anipis balna lalahnina, gabamint yaklauwi di paraswa lalahni, gabamint kamnipani awaskat dakni uk kamnipani gabamint lalahni bik yus mumunwa tingnita Tani barangni dunin, laihiw talwa atnin dawak ampat warni yamwa bik minit talwa atnin.

Lanibin 156. King Sauni Aiska Tingnita Yamwa Yamnini Minit Talwa anipis kidi Alas parasni duwi tingnita yamwa ki, La Rikni dawak La balna kau yulwa yakat yulni manah tingni dinit yak abukwa ki; tingnita dawak warkni yamnin lalahni kidi alas tunan wauhnin parasni duwa ki. King Sauni Lani Ulwa Anipis yaklauwi adar lawa karang, tingnita ampat yus munwa tannika minit talnin yulni.

Yamnini minit talyang anipis kidi, gabamint tingnita muihni balan ampat tingnita yamwa tannika walwi talwi yayakna dini balna kidi laih ulwi yakwi muihyak niningkawa atnin ki, dawak yak pasyakat talwak La bahna bang karang kat, walwi yakna dini balna kidi La wihta kau sihwa atnin ki, kapat yamwas karang kat, trabil yamna muihnina yulni malyang kapat kalkulna karang.

King Sauni Aiska Tingnita Yamwa Yamnini Minit Talwa Anipis Prisidnniti dawi Usnit kau muihni kidi, yaka tanituna daknini kaluduhwi wiitnna pas muinah walwi yakna karang ki, angdika baisa bunitu mahni yakwarang muihni yak, dawak kuirh as wark yamwarang dawak bik sip karang warkni yak watwi pakna atnin.

King Sauni Aiska Tingnita Yamwa Yamnini Minit Talwa Anipis Tanituna kidi awaskat, pas munah wais kau pakna muihni kidi, warkni yamwa yulni kidi kurih bani, King Sauni Lani Ulwa anipis kau kiwi niningkana karang, awaskat yulwarang mani balna yak.

Kiwi niningkanin kalaih tanituna palni awas kat, pakna muihni kidi yamna karang.

Lanibin 157. Gabamin Tingnita Yamwa Yamnin Minit talyang kidi tingnita yamnin ridi kalahwarang dawak yamnin tani balna kidi la munah barangni yamna karang.

Arto. 158. La yamnin parasni kidi pa muihni balna kaupak utuhwa ki, dawak yaka ayangni yak dawi La Laihwi Yamnin Parasni kau pakna ki, La kidi laihwi yamna atnin yulni, yaka pasyak bang karang ki, La Wihta balna, La kau pakwi dana yakat.


Arto. 159. La Yamwa Wihnita balna kidi, aslah kaluduh lani pasyakat tingnita yayamwa ki, dawak tanituna nuhni kidika, La Wihta Rikni Parasni duwa balan kidika ki. La Laihwi Yamwa Parasni kidika King Sauni Aiska Tingnita lalahni kaupak 4% minitkau wark lalahni karang ki. La yamwi bayakwak Watwi kiwi La walnin wihnita bang karang ki, La Wihta Nuhni dawak Pa Lani wihnita bik bang karang ki, dawak amapt kaluduhwi warknina yamnin tannika laih, La munah yamna karang ki. La wihta tingnita yamna atnin tani apahwi dawa ki, dawak adika laih, La yaklauwi yamna karang ki.

Lani yamnin dawak la yamwi bayakna kidi kat yamna atnin parasni kidika La Laihwi Yamwa Parasni tingni yak manah duwa ki. Gabamint Araknibus Turukyang wihnita balna kidi, arakbus turukyang la babahna lanina manah yayamwa karang, kaunah, La Wihta Rikni kau tanitdaknin lani balna kalaih sip karang wawalna atnin.

Lanibin 160. La yamnin tunan wauhnin kidika parasni kalawa ki, La kat Yalahnin kulnin lani tuni kidika; muih ramhnina mint talwi tanitdakwa ki, la ais yulwa yakat yamwa munah, awaskat, la yamnin parasni kalana yakat yamwamunah.

Lanibin 161. La Wihta Rikni Tunan Muihni Kalnin kat, apatnah muihni atnin ki:

1) Nikarawah walanibis atnin. La munah King uk sauni walanibis kalna balna kidi, kingni uk sauni kaupak ayangni yakpamin karang ki, baisa walwi yakwas yak, kurih arungka tanit kau.

2) Layar atni ki, dawak rispik muihni laih atnin ki, la wihta anipis as tunan duwi bayakna atnin ki, awaskat, La yamnin tingnita kuirh salap mintkau yamna muihni atnin ki, dawak La Rikni Palni Wihnita kalnin walwa kat laih, kuirih singka praisni La yamwi bayakwak watwi La wawalwa wihnita pasyak yingta yamwi bayakna muihni atnin ki.

3) Pa muihni kapat dawak king tingnita yamwa yak bik kakahni dis atnin ki.

4) Kurih muihas luih minitkau salap minitkau singka (35) duwas atnin dawi kurih Muihas luih bas minitkau salap minitkau singka (75) minitkau atnin awas ki, tingnita kau kalanin mani yakat.

5) Layar warkni dawi La wauhnitaya tingnita yamna yakaupak, la awi pat kau bukna muihni atnin awas ki.

6) Gabamint sukuni turukyang warkni muihni atnin awas ki, kapatnah muihni kat, tingnitai dawi kalahna atnin ki, tingnita kalawas tanit kaupak, waiku salap minitkau bu praisni yak.

7) King sauni pas akat, dawi kalahwas, kurih arungka yalahna atnin ki, tingnita kau baisa kalawas tanityak, kidika pasyak kawas ki, gabamint yakaluwi King sauni uk kau sihwak tingta yamwa balna, King sauni mahni kaluduhna tingnitai yamwa dai kat, awaskat King uk sauni kau skul kawa lik dai kat.

Lanibin 162. La Wihta Rikni Tatuna balna kidi dawak La yamwi bayakwak watwi la wawalkat lani yamyang Wihnita balna walwi yakwarang tingnita kaupak sip karang yakpamna atnin, La Rikni dawi La balna ulna kidi minit bayakwarang yulni manah. La Wihta Rikni Tanituna balna kidi Lalaihnin awas parasni duduwa karang ki.

Lanibin 163. La Wihta Rikni Palni kidi, pasyakat La Wihta salap mintkau salap minitkau tiaskau as bang karang ki, King Sauni Lani Ulwa Anipìs yaklauwi walwi yakna karang, kurih singka tingta yamnin yulni.

La Wihta Rikni Palni daknini kidi tingnitakau sahyakwi diawak tingnita yayamwa karang, Sahyakna banikau muih yapakbang karang kidi dawak ampat tingnita yamnin ridi kalnin kalaih witinna
kaunah barangni yayamna karang, ais la yulwa yakat. Gabamint tingnita muihni La Rikni kau yulwa kidi minit bayakwarang kat, awaskat Gabamint tingnita parasni parasni satni paskau, biri biri, La Rikni minit bayakna yulni kakahni duduwa karang kat, La Wihta Rikni tanituna bitik kaluduhwi barangni yamna karang.

King Sauni Lani Ulwa Anipis yaklauwi, La Wihta Rikni bani yaihnit yak Wihta uk as pakna karang, adika balna paina karang, La Wihta Rikni Palni tingnita pasyakat kawi yamna atnin, Wihnita as dis karang mani yak, adar yakwi kalahna karang kat, Lani yamwa muihni balna karak libitna lani as duwa yulni dawi kalalahna karang kat.

La Wihta Rikni Palni Tanituna balna kidi, King Sauni Lani Ulwa Anipis muhnina yak tingnita pani lalaihwarang ki, La Praminis yamwi bayakwarang usnitkat, dawak witinna pas munah, butmunwi yayakwarang ki, King dawak usnit kidi, bunitu baisa yakna muihni kat, kurih as tingta yamwarang ki, dawak sip karang watwi ana atnin tingta yamni yamwarang kat.

Lanibin 164. La Wihta Rikni Palni tingnita yamnin duwa karang ki:

1) La barangni yamnin tingnitai kidi ridi yamnin dawak tunan duna atnin.

2) King sauni pas akat La wihta balna layamwi bayakwa, Pat muihni kidi tanitdaknin lani wawalwarang kat laihwi talwi barangni yamnin karang ki, La kau ampat yamnin yulni tani balna ulwi dana balna munah.

3) La Rikni paskau muih ramhnina diawa balna kidi lani bahna kat, tanit daknin lani walwa kat, laihwi talwi talwi barangni yamnin karang ki, Tanit Daknin Lani kau ais yulwa yakat.

4) La Rikni kau ais ulwi dana balna minit bayakwi yamwarang kat, laihwi talwi barangni yamnin karang ki.

5) Lani yamwi bayakwak Tanitdaknin Lani Wihnita balna tingnita kalanin dawi warkni kaupak yakpamnin, La Wihta Rikni pas kaupak bunitu kuata bas karak.

6) King uk sauni kaupak, akat silak bukna balna kat, kingnina kaupak yuyulwak sihnin yulni kidi barangni yamnin, dawak Nicaragua walanibis balna kat laih, sihwas atnin kidi barangni yamnin.

7) King sauni aiska kau wihta balna, la daknitar balna, muih yamnini duwa balna dawak di bakannin ayangni ulnin wihnita balna warkni kalanin dawak tingnita kaupak yakpamnin, Ampat La Rikni kau yulwa yakat.

8) Layar dawi La wauhnitaya ulnin tingnita yamnin yulni yuyulwa balna yak, anidar kalana atnin, kaput bik anidar tingni daknin, dawak watwi dianin bik, ais la kau yulwa yakat.

9) King uk sauni Lani wihnita balna la yamwi yulwi yakna balna kidi, lani laihwi yamnin yulni anidar parasni kalanin.

10) Gabamint tingnita tunan wawauhwa pas munah biri biri trabil duduwa kat, awaskat, adika balna dawi pa muihni as karak trabil duduwarang kat laihwi talwi barangni yamnin karang.

11) Alkaldi tingnita tunan muihni paskaunah kakahni duduwarang kat, awaskat, adika balna dawi gabamint warkni rikni muihni balna karak, laihwi talwi barangni yamna atnin.

12) Gabamint Tingnita Rikni Parasni duduwa pasmunah, La Rikni kau ais yamnin parasni diana yulni trabil duduwa karang kat, laihwi talwi barangni yamna atnin.

13) Gabamint Rikni Anipis balna dawi Alkaldi dawi Atlamtik Kus kau,Alas Lani kat Yalahwa Gabamint balna karak La Rikni kau ais yamnin parasni diana yulni kakahni duduwa karang kat, laihwi talwi barangni yamna atnin.

14) Anipis paskau ampat tingtayamnin lani kidi yamwi dunin dawi anipis tingnita muihni balna pakna atnin.

15) La Rikni dawak La balna yaklauwi ais parasni uk kalawa balna kidi yamna atnin.

Lanibin 165. La Rikni Wihnita palni balna dawak wihta balna lani yamwa pasyakat, alas parasnina duduwa ki, dawak LaRikni dawi La balna yak manah rispik mumunna karang ki; adika kulninna tuhni yak usnit uywa karang ki, papatni lani, muuhnina laih dawi muih tanitdaknin ramhni duwa kidi. Nikarawah akat La barangnin tani kidi minit dis ki.

Lanibin 166. La barangnin tingnita tunan wauhnin kidi, ridi kalahwi tingta yamna karang pa muihni balan karak kalpakwi, la yaklauwi tani balna ukwi dana karang. La wihta muihni balna kidi Layar, awaskat Layar awas karang bik, tingta yamwa pasyak papatni parasni duduwa karang.

Lanibin 167. La wihta nunuhni dawi wihta uk balna kaupak la yamwi lalakwa balna kidi, Gabamint tingnita tanituna, Kaluduhna balna, muih balna dawi, muih kaluduhna balna bitik kidi, minit bayakwas yakat yamnin karang ki.

Lanibin 168. Tatuna Walwi Yaknin Tingnita Yamnin Parasni tingni yak tingnita palni duwa ki, iliksan, tingnita ridi yamnin, tunan dunin dawi minit talnin, dawak pa dawan balna kaluduhwi la ahawarang balna bitik.

Lanibin 169. Tatuna Walwi Yajnin Tingnita Yamnin Parasni pasyakat bangki, King Sauni kau walwi yakmin Tunan muihni balna dawi walyaknin tingnita yamnin anipis bikisni balna tingnina dinitkau bang balna kidika.

Lanibin 170. King sauni Kau tatuna walyaknin pasyak bang karang ki, lani tanituna tiaskau bu dawi usnit kau muihni balna bas, adika balna King Sauni Lani Ulwa Anipis yaklauwi walwi yakna karang, adika La Rikni, lanibin 138, numniba 8) kau ais yulwa yakat.

King Sauni kau Tatyna walyaknin Tingnita balna pasmunah witinna yaklauwi King dawi usnit kidi walwi yayakna karang. Kurih as tingta yayamna karang, dawak sip karang tingnitai yak watwi pakna atnin.

Lanibin 171. King Sauni kau Tatuna Walwi Yaknin Tanituna Kalnin kat, apatnah muihni atnin ki:

1) Nikarawah sauni walanibis atnin. La munah King uk sauna walanibis kalna kat, yakaupak ulwi lawi kalahnin ki, baisa tingnita pani yak awas tanit kaupak, kurih arungka praisni.

2) Pa muihni kapat dawak King tingnita pasyak kanin walwa tani yak bik kakahni dis atnin ki.

3) Kuirih muihas luih minitkau salap dawak muihas luih bas mintkau singka kuihwas atnin ki, tingnita kau kawa mani yak.

4) King sauni pas akat, dawi kalahwas, kurih arungka yalahna atnin ki, warkni kau baisa kalawas tanityak, kidika pasyak kawas ki, gabamint yakaluwi King sauni uk kau sihwak tingta yamwa balna, King sauni mahni kaluduhna warkni yamwa dai kat, awaskat King uk sauni kau skul kawa lik dai kat.

Tatuna Walwi Yaknin Tingta Yamyang tanituna muihni kalnin sip awas karang ki.

a) Tatuna nuhni King dawi usnit kidi wanaihni kat, ani palni kat, sulani arungka yakat, dawi marit lani munah sulanini kat laih, sulani bu kat. Tauna Nuhni King walwi yakna mani yak, pat tingnita paskau sak dai kat, traniibl pasyak bukna karang, dawak tingnita kidi dawak iliksan yamwa mani balna yak sipyamwas karang, dawak usnit kau muihni yak tingnita kidi dana karang ki.

b) Walwi Yaknin Tingta yamwa munah tingta pani laihnin pasyak kana muihni kat, awaskat but munwa pas kau kira muihni kat.

c) King Sauni Tingnita Rikni Parasni uk kau tingta duwa muihni kat, dawak gabamint di tunan minit dakwa kaupak minit lauwi kalawa balna, Alas lani awaskat alkaldi gabamintni kaupak minit lauwi diawa muihni balna, pasyak awas ki, skul sumalyang awaskat, daktar warkni yayamwa balna kidi.

d) Suku turukyang tingnita duwa balna, awaskat, warkni palni yamwas bik, tingnita pani diawa mani kawas tanit yak, waiku salap minit kau bu pasyak, tingnita danin ulwi lawas muihni kidi.

e) (tap pamna).

Lanibin 172. King Sauni kau Iliksan Warkni tanituna balna kidi kurih singka warkni yayamna karang, warkni laihna mani kaupak; adika mani balna pasyakat, La laihnin awas parasni duduwa karang.

Lanibin 173. King sauni kau Tatun a Walwi Yaknin Tingnita Tanituna balna kidi adika tingta duduwa karang:

1) La Rikni kau ais yulwa yakat, Walwi yaknin yamnin, pa muihni kaluduhwi la yamwarang tingnita balna kidi ridi yamwi tunan duna karang.

2) Walwi Yaknin yamnin Lani kau yulwa yakat, walwi yaknin tingnita anipis uk balna kau tingnita muihni balna pakna atnin.

3) Walwi yaknin tingnita yamnin mani balna ridi yamna atnin.

4) Walwi yaknin tingnita yamwa pasyakat, ais tranibil bang karang kat, La Rikni kau dawi la balna kau ais yulwa yakat kakahni laihwi barangni yamna karang.

Kaput bik, minit talna karang ki, King sauni aiska walwi yakwi dawi Alkaldi walwi yakwa paskau kira muihni balna kidi, La kau ais yuyulwa yakat yayamwa atnin yulni. Alkaldi walwi tingnita balna kau laih, Alkaldi, usnit kau muihni dawak sauni pisni tunan muihnni walwi yaknin muihni balna kidi, King sauni pas akat, laihwatwas kurih arungka wark kalahna muihni atnin ki, walwi yaknin mani kat, yaka paskau kawas ki, king sauni uk kau sihwak gabamint ayangni kau tingta yamwa dai, awaskat sau uk kau skul kawa muihni balna kidi.Minit yakat, alnikaldi sauni pasyakat dawi kalahwas kurih bu praisni tingnta kalahna atnin ki.

5) Tatuna walwi yaknin tingnita yayamwa anipis satni balna tingnina dinit kau tingnita yayamwa kaupak wark wauhnitaya barangni yamwi lalawa balna, dawi pulitik daknini balna la bahnaatwi anwi yuyulwa balna kidi laihwitalwi barangni yamnin.

6) Walwi yaknin lani yakat ulwi lana karang, walwi yaknin tingnita yamnin tani yamnin ridi yamna karang, tingnita bitik kidi laih barangni sangnika tanitdakwi yamna atnin.

7) Tingnita yamwa anipis balna yak diyulnin, King Tingnita laihnin walwa dakni iliksan paskau kana muihni sangnika yamni tanit daknin yulni.

8) Walwi Yaknin paskau, pa muihni kaluduhwi la yayamna balna kulwi yakwi saran laihna atnin, dawak, warkni saran kat ais kalahna balna kidi ulwi yakwi muih kau laihni di yulna atnin.

9) Anipis paskau tingnita yamnin lani ulwi anin.

10) Witin tingnita tingni yakat Pa Muihni Bitik Ayangni Ulnin tingnita Anipis kiid ridi yamna atnin, kaputbik, pa dawan ayangni wauhniraya dawi but munnin pani balna.

11) La kau ais yulwa yakat yamwi kuihna daknini balna kau King tingnita laihnin walwa Daknini kapat Lani wauhnitaya kalana atnin.

12) King tingnita laihni walwa daknini balna, tatuna yaknin walwi yaknin yamwi bayakwak but munna bitik paskaupak, kuata as yakwas kat, lani wauhnitaya kidi tingni dakyakna karang, dawak bik, barang tappamnin , kaput yamnin la kau ulna sak karang kat.

13) King tingnita laihnin walwa daknini balna tanituna palni walwi yakna yulni kal bibilwa kat, dawak king tingnita laihnin walwa daknini yulni La balna bang kidi yulni, daknini tingnita yamnin lani balna yulni bik kalbilnin lani sak karang kat, mint talwi barangni yamnin.

14) La Rikni dawi la uk balna kau ais uk yulwa balna kidika bitik. King Sauni kau Walwi yaknin Warkni Yamwa Tanituna balna kaupak ais lani ulwi yayakwa balna niningkauh, watwi lani walnin tani satni as bik dis karang ki.

Lanibin 174.King Sauni kau Walwi Yaknin Tingnita Yamnin Tanituna palni balna dawi sutni kau muihni balna kidi, King Sauni Aiska Lani Ulwa Tanituna palni muhni yak tingnita pani lalauhna karang, La pranimis yamwi bayakwa munah.

Lanibin 175. King sauni tingnita yamnin yulni apat sahwi yakna karang, Sahyakna Nuhni, Atlantik Kus kau Alas Yalahwa Sauni dawi Alkaldi Sauni. Yamwi yakna kid, sauni nuhnini, yapak, ampat lauduhna kidi, tingnita dawi sauni pisni bikisni kau ampat tingnita yamnin tannika laih, adika tingnita lani munah yamna karang.

Lanibin 176. Alkaldi sauni kidika, king sauni warkni yulni sahyakna yakat, rikni tuna palni ki.

Lanibin 177. Alkaldi sauni balna kidi tingnita yamnin dawi mukuntak tani yak alas parasni duwi wark yayamwa ki. Tingnita tunan gabamintni bin wauhnin kidi alkaldi sauni tanituna tingnina yak sak ki.

Alas lanikat tingnita yamwa yakarak Gabamint Tingnita Rikni dawi King Sauni Tingnita Parasni tingni dinit kaupak kalahwa tannika awas ki, Alkaldi sauni balna kau tingnta yamnin duwa balna pas yakat. King Sauni Aiska Tingnita yamnin mukuntak paskaupak, wark mukuntak aitani kat kalanin lani kidi awi dawa ki, dawak sahwi yakwi diana karang angdika alnikaldi sauni, baisa llah dibin yakwa balna yak baisa parasna karang ki.

Yapak praisni sahwi yakwi kalanin kidi la kau ais yulwa yakat yamna karang. Alas tingnita yamnin parasni kidi, alkaldi sauni lani munah laihwi yamwa karang, dawak kidika lani barangni awi dunin kat, nitni duwa karang, La yamyango biitk kaupak, baisa mahnini palni bunitu kalana atnin.

Alkaldi sauni gabamintni binina kidi, parasni duwa ki, sauni bin pasyakat, pani muihni sangnika baraknin tingnita yamna atnin.

Witinna saunina pasayakat sau ritsni yaknin yulni kantrak rawawaswa balna kidika yulni, King Sauni rikni yaklauwi alnikaldi sauni tanituna kulninna lani yulwi dakanin nitni as karang ki, basia barangni yamwas tanityak.

Alkaldi sauni Lani pasyak anin karang ki, di uk balna minit yakat, alkaldi sauni tingnita yamnin parasni duwa balna kidi, Gabamint rikni, King sauni aiska kau indian sulani balna, King Sauni Tingnita Parasni karak dawi gabamint anipis uk balna karak ampat kalpakwi tingta yamnin tani balna kidika.

Lanibin 178. Alkald, usnit kau muihni dawi sauni pisni tanituna balna kidi pa muihni balna yaklauwi walwi yayakna karang, muih bitik, papatni, barangni, pri lani karak dawi tanitdakwi kalawak but munwi yayakna karang, La ais yulwa yakat. Alkaldi dawi usnit kau muihni kidi angdika baisa but yakna kidika laihna karang. Sauni pisni tanituna balna kalaih, butmunwi bayakwak pa muihbni karak libitwi kulwi yakwi ahana karang. Alakaldi dawi sutni kau muihni kidi nawatwi wat aslah manah watwi alkaldi kalnin sip karang.

Dawak Alkaldi dawi usnit kau muihni kidi tingnita yamwi saran laihna asluih, nawatwi but munwi yaknin sipawas karang.

Alkaldi kalnin kat apaynah muihni atnin ki:

1) Nikarawah walanibis atnin ki.
2) Pa muihni kapat dawi king tingnita kanin wawalwayak kakahni as bik dis atnin ki.
3) Kuirh muihas luih minitkau as laihna atnin ki.
4) Alkaldi sauni tanituna balna kidi kurih arungka wark yayamna karang, king sauni kau walwi yaknin tingnita yamwa tanituna muhnina yak tingnita pani lalaihna mani kaupak.
5) Alkaldi kapat sip kiras karang, gabamint Minisnitru dawi usnit kau muihni kidi, sip karang kirana atnin tingnita kaupak ulwi lawi dapamna kat, baisa walwei yaknin yamwas tanit kaupak waiku bas pasyakat.

Sauni pisni tanituna, Alkaldi dawi usnit muihni balna kidi tingnita disnin sip karang ki apatnah kakahni yulni kat:

a) Tingnita kaupak ulwi lawi dapamwa kat.
b) Dauna yulni.
c) Kakhni as yamna yulni la kalyamwi silak kau bukna muihni, awaskat, La as bahna yulni, la munwi silak kau bukna kat, warkni kau sak atnin mani duwa dai praisni awaskat mintkau silak kau sak atnin dini kat.
d) Ma muihas luih bas praisni warkni kaupak dawi kalahna kat.
e) La Rikni kau Lanibin 130, pisni sahyakna baskau yulwa dini kidi yamwas minit bayakna kat.
f) King Sauni tingnita Yamnini Minit Talwa Anipis muhni kau, ais dini duwa balna kidika, tingnita duna mani yulwi yaknin bik yulwi yakwas dana kat.
g) Alkaldi tingnita mukuntak tingnita yamni yamwas dana yulni, King Sauni Tingnita Yamnini Minit Talwa Anipis yaklauwi tingnita yamnin sip awas muihni kapat papakna muihni kat, Lanibin sahyakna pisni d) dawi e), Alkaldi sauni tanituna la yamwi ulwi yaknin karang ki, Alkaldi awaskat, tanituna uk as di dutni yamna yulni, tingnita kaupak tingni dakyakwa tannika kidi.

La yamwi ulwi yayakwa dini awaskat, la wauhnitya parasni duwa balna, sahyakna bin yulwa yulni ulwi yayakna kidika, Iliksan Tingnita Yamwa tanituna balna kau sihnin karang ki, dawak ayangni birwi sihnin karang ki, Alkaldi usnit kau tingnita yamwa ayangni kidi, Alkaldi pani yak kawa kidi yulni, awaskat, tanituna uk ayangni as, Alkaldi usnit kau miuhni kidi pani yak anin karang kat, awaskat Alkaldi sauni tanituna muihni as pani yak anin yulni kat, wais kau anin kidi anidar yuyulna karang.

Walwi Yaknin TingnitaYamwa Tanituna kidi ma salap minitkau singka pasyak, la pranimis kidi kalawak yamwak tingnita pani kalana karang.

Alkaldi Sauni tanituna balna tingnita tunan dunin angkat parsani duwa kidi, dawi ais praisni tingta yulni lalah laihnin sip kidi La munah barangni yamna karang.

Lanibin 179. Gabamint parasni yaklauwi parasna karang King sauni aiska yak baraknin lani papatni duwi kiuna atnin yulni.

Lanibin 180. Atlantik Kus sauni kau pani binina kidi ramhnina duwa ki, sangnika duwi barakwi kiuna atnin, sara mani kaupak pani muihni balna ampat kaluduhwi sangnika aina tannika yakat.

Gabamint parasni yaklauwi adika pani binina yak tanitdakwa ki, saunina ritsni balna yus munna atnin yulni, Ampat saunina dakwi duwi aina kidi parasni kalana karang, dawak pani tanituna balna pri lani kat diawak walwi yayakna karang.

Kaput bik, yalahwa tannika dawi tunina, sutsni lani dawi ampat lanina duduwa kidi, tanitdakwi diawak nining ban duduwa karang.

Lanibin 181. Gabamint parasni yaklauwi ridi yamna karang, Atlantik Kus kau Indian Pani dawi Sulani uk pani balna kau Alas Lani kat Yalahnin Lani As, yaka pasyak, La balna duwa karang ki, gabamintni anipis ais tingnita yayamwarang kidika, Gabamnit tingnita rikni dawi King Sauni Aiska Lani Rikni Yamwa parasni karak, dawi Alkaldi balna karak ampat kalpakwi tingnita yamwarang tannika, dawak ais ramhnina duduwa tannika bik. Lani kidika barangni yamnin dawi sat uk wirlanin kat, La Rikni kau ampat yayamwa tani munah yayamwa karang ki.

Atlantik Kus kau Alas Lani Kat Yalahwa Gabamintni sauni kau, sau ritsni balna yakwi yus munnin yulni gabamint yaklauwi adar dawi kantrak diawa kidi, Alas Yalahwa lani gabamintni tanituna kaupak anidar karak yamna karang ki.

Atlantik Kus kau Alas Yalahwa Lani Gabamintni Tanituna walwi yaknin yamwi yayakwa kidi, parasni duwa kidi disna karang ki, La kau ais yamwa munah disnin sip ki tada ulwi dawarang yakarak.

Lanibin 182. King Sauni Lani Rikni kidi, King sauni lani baisa nuhni palni kidika ki; la uk balna kidi adika dinityak abukwa ki.

La balna, la yayamna balna, gabamint lani, tingta yamnin lani, adar balna dawak lani satni bitik, la rikni niningkauh yuyulwa kat, parasni as bik dis karang ki.

Lanibin 183. Gabamnit Tingta Rikni Parasni as bik, gabamint tingnita anispis awaskat, tingnita muihni as bik, King Sauni Lani Rikni dawak Lani uk balna kau tingta yamnin parasni kalawa minit kau baisa parasni dis kaang ki.

Lanibin 184. La Rikni lani balna ki, Iliksan Lani, Trabil Kalahwak Lani dawi Tanitdaknin Lani, King Sauni Lani Rikni parasni duwa mani yak lani ulwi yayakna balna kidika.

Lanibin 185.Tatuna nuhni King, Ministru balna Kaluduhna kidi sip karang, King sauni aiska kau, awaskat saunipisni as yak, muih ramhnina dawak muih sangnika tanitkdakwa kidi laih watnin lani as ulwi yakna atnin, ma bulah dini, awaskat, baisa ma naini dini bik yamnin sip karang ki, King sauni sangnika, mukuntak tingnita awaskat, minitkau trabil as kaiwa yulni. Ampat yamnin tannika kalaih, kakahni kalahwak Lani kidika yaklauwi barangni yamna karang.

Lanibin 186. Tatuna nuhni King kidi sip laih watwas karang muih ramhnina dawi sangnika tanitdaknin yulni lanibin 23, 24, 25 numniba 3), 26 numniba 3), 27, 29, 33 numniba 2.1) sutni pisni yak daak numniba 3 dawi 5), 34 kau ulna balna kidi, yaka pasyak kawas ki, numniba 2 dawi 8), 35, 36, 37, 38, 39, 40, 41, 42, 43, 44, 46, 47, 48, 50, 51, 56, 57, 58, 59, 60, 61, 62, 63, 64, 65, 67, 68 sahyakna pisni tuna, 69, 70, 71, 72, 73, 74, 75, 76, 77, 78, 79, 80, 81, 82, 84, 85, 87, 89, 90 dawi 91 kau ulna balna kidika.
Lanibin 187. La balna, Gabamnit lani awaskat, ampat la tingnita yamni n l ani bal na La Ri kni kau yul wa bal na ni ni ngkauh yulwarangkat, La Rikni Tanitdakwi La awas kapat yamnin Lani awi dawa ki, adika laih, pa dawan muihni bitik yus munnin sip karang ki.

Lanibin 188. La bikisni as, wark yamna lani as, awaskat yulbauwi laana as, dawak gabamint tingnita muihni as di yamna awaskat yamwas kat, di as kakahni kaina kat, awaskat, gabamint tingnita muihni as, adika Lani Rikni kau yulwa balna dini as, lani bahna awaskat, la bahnin trai talwa kat, nining kauh tanitdaknin lani kidi ulwi dawa ki.

Lanibin 189. Muih muihni nuhni tanitdaknin Lani kidi awi dawa ki, muih uluhni lani, muihni nuhni, dawak tanitdaknin dinibalna kidi lani bahwa kat, awaskat, lani bahnin kakahni duwabalna kat tanitdaknin yulni.

Lanibin 190. Tanit Daknin Lani kidi adika sapta kau ulna balna yak tingnita yamna karang.

Lanibin 191. King Sauni Lani Ulwa Anipis kidi adika Lani Rikni pisni as kau sat uk wirlanin parasni duwa ki, dawi Lani Rikni aiska satuk wirlanin tunan bahwa lani ridi laihwi talwi baangni yamna atnin.

Lani Rikni pisni as kau sat uk wirlanin tunan bahwa lani kidika, Tatuna nuhni King tingni yak sakki, awaskat, La yamyang bitik paskaupak tarhti pursin bunitu karak sip karang yamna atnin, La Rikni aiska sat uk wirlanin tunan bahnin lani kalaih, La yamyang bitik pas kaupak, papusdak minitkau as karak sip karang.

Lanibin 192. La Rikni pisni as sat uk wirlanin tunan bahnin lani kidika angdika lanibin awaskat lani binina wirlani awa kidi laih pakna atnin ki, dawak ais yulni wirlawa tannika bik ulwi lawa atnin ki; dawak kuminti as kau lana karang, dawak ma muihas luih bas pasyakat lani as ulwi lana karang. Lani pisni as satuk wirlanin walwa kidi tanit yak, La ampat ulwi yayakwa tani kat awi yayamna karang.

La Rikni pisni as wirlanin lani kidika kurih bu la yamwa tingnitapasyakat laihwi tatalna karang.

Lanibin 193. La Rikni aiska sat uk wirlanin tunan bahnin lani kidika, lanibin bayakna kau yamnin yulwa tani balna munah yamna karang, niningkanin dawi lani ulwi yaknin tani balna yakat.

La Rikni aiska sat uk wirlanin tunan bahnin lani kidika barangni yayamna mani, King Sauni Lani Ulwa Anipis yaklauwi mani as pakna karang ki, walwi yaknin yamwi King Sauni Lani Yamyang balna wisamni uk walwi yaknin yulni. King Sauni Lani Yamyang balna kidi parasnina ban duduwa karang, La yamyang wisamni walwi yakwi ahawarang mani kat.

La Rikni wisamni kidi, La yamyang wisamni balna yaklauwi yulwi talwi barangni yayamwas kat, La Rikni umani kidi ban parasni duwa karang ki.

Lanibin 194. La Rikni pisni as sat uk wirlanin yakat, La yamyang bitik paskaupak siksti pursint bunitu nit karang ki. La Rikni aiska sat uk wirlanin tunan bahnin lani barangni yamnin laih, bitik paskaupak, papusdak minitkau bunitu nit karang ki. Tatuna nuhni King kidi yaklauwi, la Rikni Pisni as satuk wirlawa kidi parasni kalana karang. Akat laih, laihwatnin ramhni duwa kidi ramhni diswa ki.

Lanibin 195. La Rikni lani balna sat uk wirlanin kidika, la Rikni pisni as sat uk wirlanin yak ampat yamnin tani yuyulwa yaka munah yayamna karang, La yamnin warkni kurih bu yamnin yulwa kidika manah kapat yayamwas karang.
Lanibin 196.Adika Lani Rikni parasni duna karang, La Gaceta, Gabamint Tingnita Mabani Ulwi yakwa kau ulwi yakwarang mani kaupak, dawak King Sauni Tingnita Palni Yamnin lani dawi, Nikarawah Walanibis balna Ramhnina dawi Sangnika Tanitdakwa Lani, kaput bik angdika lani as adika Lani Rikni niningkauh yulwarang bitik kidi parasni parasni lakpamwa ki.

Lanibin 197. Adika Lani Rikni laih, King sauni aiska kau, ispayul tuni kau, ulwi yakwi niningkana karang, sim kaput Atlantik Kus pani binina kau tunina yuyulwa kau ulwi yakwi niningna karang.

Lanibin 198. King sauni paskau la satni balna bitik kidi parasnina ban duduwa karang, La Rikni nining kauh yuyulwas balna kidika, sat uk wirlawas maniyak.

Lanibin 199. La Wihta satni as balna kidi, adika Lani Rikni parasni laihwamani kat, ban tingnita yayamwa karang ki, La Barangni Parasni tingni dinit kau bukwas mani yak. Tingnita muihni paknin dawak ampat warkni warkni laihwi yamnin tannika balna kidi, lani yayamna kau ais yulwa yakat yayamna karang ki.

Kasput bik, La Wihta Aihwa balna kidi ampat tingnita yayamwa yakat yamwi uywa karang ki, tawan muihni karak kalpakwi la yamnin kulnin lani tuhni kidika awi duwi yus mumunwas karang mani. Adika kulnin lani tuhni adika, sip karang King saui aiska kau yamwi kiwa atnin, ais nitnina duwa karang kat.

Lanibin 200. Waramni kat, King sauni tingnita yamnin yulni sahwi yakna yakat duwa karang lani wisamni ulwi, sat uk sahwi yakwas karang mani yak.

Lanibin 201. Kuah wainiku 25 mani, 1990 kurihni yak, La yamyang balna walwi yayakna kidi, Iliksan Tingnita Yamnin Tanituna yaklauwi tingnita paniyak dana karang, dauna wainiku 24 mani sim kurihni yak, yaka mani parasnina witwa ki, La yamyang balna wing wainiku 4 mani, 1984 kurihni kau walwi yayakna muihni balna kidi, dawi witinna parasnina diawa ki, adika Lani Rikni, lanibin 136 kau yulwa yakat.

Tatuna muhn King dawak usnit kau muihni kuah wainiku 25 mani 1990 kurihni yak walwi yakna kidi La yamyang balna yaklauwi tingnita pani yak awi dana karang, La praminis yamwi bayakna usnit kat, dauna wainiku 25 mani, sim kurihni yak, yaka mani parasnina witwa ki, King dawi sutni kau muihni, wing wainiku mani, 1984 kurihni kau walwi yayakna muihni balna kidi, dawi witinna parasnina diawa ki, adika Lani Rikni, lanibin 148 kau yulwa yakat.

La Barangni Wihta Rikni Palni dawi Iliksan TingnitaYamnin Tanituna balna, dawi King Sauni tingnita Parasni dawi tanituna uk balna bik ban tingnita yayamwa karang pani kau kanin muihni balna baisa walwi ahawas kat, adika Lani Rikni kau yulwa yakat.

Lanibin 202. Adika Lani Rikni kau Ayangnina rawasnin kidika, King Sauni Lani Ulwa tanituna dawi La yamyang balna karak, dawi King bik kalpakwi, wayani arungka kau rawawasna karang. Dawak apapakna karang, King Sauni Lani Ulwa Tanituan anipis yakat, King Anipis yakat, La Barangni Wihta Rikni Tanituna Anipis yakat dawi Walwi Yaknin Tingnita Yamwa Tanituna Anipis yakat, dawak wayani bani kidi Nikarawah Sauni Lani Rikni Wauhnitaya Palni kapat parasni kalana karang ki. King yaklauwi ulwi yakna karang, La Gaceta, Gabamint Tingnita Mabani Ulwi Yakwa kau.

King Sauni Lani Ulwa Anipis tingita Yamwa pasyakat yakna ki, Manawah pani akat, tingpal wainikua, ma salap minitkau tiaskau arungka mani yak, andat naintin iti siks kurihni yak, lanibin wirlalawas dini balna kidika, dawak sat uk wirlana balna kidi la Numba 192, lanibin 20, numniba tuna VI kau yulwa balna pasayak anin anidar lana yulni. King sauni Lani Rikni pisni as sat uk wirlanin Lani, barangni yayamna kidi, kuskus wainiku ma as mani yak, naintin nainti paip kurihni yak, La numba 330, lanibin 8, numniba tuna VI kau yulna kidi, King sauni Lani Rikni pisni as sat uk wirlanin lani barangni ahana kidi, kuskus wainiku itin mani, tauisn bu kurihni yak, dawi la numba 520 lanibin 7 yak yulwa kidi, King sauni Lani Rikni pisni as sat uk wirlanin Lani, barangni yayamna kidi kuskus wainiku salap minit kau bas mani, tausin bu minit kau singka kurihni yak, La Gaceta, Gabamint Tingnita
Mabani ulwi yakwa numba 35 yak ulwi kuah wainiku itin mani yak, sim kurihni yak, La Rikni kau adika pisni binina yak sat uk wirlalana ki:

1) Lanibin 201, Sahyakna pisni tuna kidi sat uk wirlana, dawak barangni yayamna La Rikni Satu k wirlanin lani, kuskus wainiku 25 mani 1990 kurihni yak walwi yaknin tingnita yamnin yulni barangni yayamna dai yakat, dawak barangni yayamna dai, kuskus wainiku muihas luih miniykau salap mani yak, dawi La Gaceta, Gabamint Tingnita Mabani ulwi yakwa Numba 46, kama wainiku tiaskau as mani sim kurihni yak ulwi yayakna dai.

2) Adika lanibin sat uk wirlalana 1, 2, 4, 5, 26, 28, 33, 34, 42, 44, 51, 56,68, 71, 92, 93, 94, 95, 96, 97, 99, 104, 105, 106, 107, 112, 113, 114, 121,125, 130, 131, 132, 134, 136, 138, 140, 141, 142, 144, 145, 147, 148, 149,150, 151, 152, 154, 155, 156, 159, 161, 162, 163, 164, 170, 171, 172, 173,175, 176, 177, 178, 181, 185 dawi King Sauni Lani Ulwa Anipis Muihni ayangni pakwa dai kidi sat uk wirlalana, King Sauni Lani Ulwa Anipis Tanituna balna kapat, La numba 192 kau yulwa ki, Nicaragua Sauni Lani Rikni sat uk wirlanin barangni yayamna yak, kuah wainiku tuna mani, naintin naintipaip kurihni yak, dawak La Gaceta, Gabamint Tingnita Mabani ulwi yakwa Numba 124, waas wainiku maarungka sim kurihni yak;

3) Lanibin sat uk wirlalana kidi 10, 20, 130, 133, 134, 138, 147, 150, 152, 154, 156, 161, 162, 163, 164, 170, 171, 173 y 178, La numba 330 paskau duwa ki, de Nikarawah lani Rikni pisni as Sat Uk Wirlanin barangni yayamna kidi kuskus wainiku itin mani, tausin bu kurihniyak, dawi La Gaceta, Gabamint Tingnita Mabani ulwi yakwa Numba 13, kuskus wainiku naintin mani sim kurihni yak ulwi yayakna dai;

4) Lanibin 138 kidi sat uk wirlana, La numba 490 paskau duwa ki, La Rikni lanibin 138, pisni 12 kidi, barangni yayamna dai, dapa wainiku salap minitkau singka mani, tausin bu mintkau arungka kuirhni yak, dawi La Gaceta, Gabamint Tingnita Mabani ulwi yakwa Numba 132, dapa wainiku 7 mani sim kurihni yak ulwi yayakna dai,

5) Lanibin 138, 143 dawi 150 kidi sat uk wirlalana ki, la numba 520 paskau sak ki, Nikarawah Lani Rikni pisni as sat uk wirlanin lani yak, barangni yayamna dai, kuskus wainiku salap minitkau bas mani, tausin minit kau singka kurihni yak, dawi La Gaceta,

Gabamint Tingnita Mabani ulwi yakwa Numba 35, kuah wainiku itin mani sim kurihni yak, yaka pasyak ana dai, La Gaceta Gabamint tingnita Mabani ulwi yakwa numba 97, was wainiku 23 mani tausin bu mintkau tiaskau bas kurihni yak;

6) Lanibin 140, kidi sa tuk wirlana ki, La numba 521 paskau sak ki, Nikarawah Lani Rikni lanibin 140 kidi sat uk wirlanin lani yak, barangni yayamna dai, kuskus wainiku salap minitkau bas mani, tausin minit kau singka kurihni yak, dawi La Gaceta, Gabamint Tingnita Mabani ulwi yakwa Numba 35, kuah wainiku itin mani sim kurihni yak,

7) Lanibin 68 dawi 93 kidi sat uk wirlana la numba 527 paskau sak ki, Nikarawah Lani Rikni pisni as sat uk wirlanin lani yak, barangni yayamna dai, kama wainiku salap minit kau singka mani, tausin bu minitkau singka kurihni yak, dawi La Gaceta, Gabamint Tingnita Mabani ulwi yakwa Numba 68, kauna wainiku ma tiaskau bas mani, sim kurihni yak, dawi

8) La Barangni Wihta Rikni yaklauiwi La numba 52 ana kidi saring wainiku muihasluih minitkau salap mani, tausin bu minitkau singka kurihni, mapiris it minitkau pausdak awarni yak, yakat yulna dai, “La sutni bin as” kidi sip yus munwas karang, yakat aput yulwa ki, “2002-2007 kuirhni yak gabamintni kidi, adika lanbin sat uk wirlana kau yulwa kidika, laihwi yamnin sip karang ki, angdika mani, king sauni pas akat king yingnita kanin awalw Daknnii baisa pararasni bas kidika: Gabamint Lani Rikni Ulwa Anipis paskau Dakni bu baisa parasni duduwa kidi dawi King Sauni Gabamintni karak yalahwi yulbauwi kulninna aslah kalalahna mani kats ,kapu munah kalpakwi tingnita yamni yayamnin yulni kat.”.

La Rikni lanibin 141 sahyakna pisni tiaskau bas yulwa yakat, dawi Gabamint tatuna nuhni King yaklauwi, lani parasni kalana dis karak, ulwi yakwa ki La Gaceta, Gabamint tingnita Mabani Ulwi yakwa kau, adika ayangni rawaswa kidi Nikarawah Sauni Lani Rikni wauhnitaya, dawi pisni as as sat uk wirlalana paskau ana kidi ulna sak ki.

Manawah pani yak ulwi yakna, King Sauni Lani Binin Anipis Rikni, kuirihbin wainiku ma salap minitkau tiaskau as mani, tausin bu minitkau salap kurihni yak RENÉ NÚÑEZ TÉLLEZ, King Sauni Lani Yamyang Tani t una Pal ni, ALBA PALACIOS BENAVIDEZ, King sauni Lani UNI Ulyang muihni usnit.”

De conformidad a los artículos 11 y 197 de la Constitución Política, se dispone la publicación del presente texto en lengua mayangna en La Gaceta, Diario Oficial, en la ciudad de Managua, Sede de la Asamblea Nacional a las ocho de la mañana del once de octubre del año dos mil doce. Ing. René Núñez Téllez, Presidente de la Asamblea Nacional. Lic. Alba Palacios Benavidez, Secretaria de la Asamblea Nacional.